《宋澤萊新著《天路拾穗》TOJ/台灣字版》

 | | | 轉寄

Chútê 30：Kūiok ê Ichekel su ánchóaⁿ teh kóng Sènglêng lāichū?

作者 Sòng Te̍klâi 2026.09.27

Chútê：30 Kūiok ê Ichekel su ánchóaⁿ teh kóng Sènglêng lāichū?

Tī konggoân chêng 598 nî, Iôtah ông Ehō͘iákin kah Êlúsalèm chòhóe hiòng sin Babúlông tèkok ê khaikok kunông Nepkatnechal（chāiūi ê sîkan tāiiok sī konggoân chêng 605 nî ~ chêng 562 nî）tâuhâng. Nepkatnechal kā Iûthài kok ê chengeng íki̍p SiōngChú sèngtiān kah ôngkiong ê póbu̍t chòhóe lia̍h khì kàu Babúlông. Siūlia̍h ê lâng paukoat ôngsek sêngoân, chiòng siúléng, ê ióngsū, kanghu lâng, kiàntio̍k kanglâng, íki̍p chèsi Pò͘ sai ê kiáⁿ Ichekel. Chit phoe siūlia̍h ê Iûthài lâng phōtio̍h tîmtāng ê simchêng kiâⁿ oân kútn̂g ê lō͘thêng, tùi chi̍tê sìkè lóng sī phekchôaⁿ iukok chi tē ê soaⁿkhu kò͘ thô͘, chhian óng khoah bóngbóng pêⁿtháⁿ ê lióng hô īhiong. In tòa tī Kebal hô piⁿ, tī chhengpà chi̍tsî ê tèkok kénglāi tēngki lo̍h lâi; in sìkho͘ûi lóng sī chi̍tkóa īkàu hongsio̍k kah chiôngsū īkàu chôngpài ê lâng.

Nepkatnechal iôngín Isulael lâng khíchō chhùthe̍h, chhīióng lô͘po̍k lúpī kah kengêng bébē. Kású chiahê Iûthài lâng ētàng khekkhó͘ nāilô, to̍h ētàng hoânêng hengōng. In teh liûbông ê tē ē siū tio̍h chin chē ê khógiām.

Ichekel su kìchài, tī chit tōaⁿ tú tio̍h gûilān ê sòegoa̍t tiong, SiōngChú pēng bô bēkìtit ūi Isulael siatli̍p sianti. Tongsî Iélímiah liûsiú tī Êlúsalèm, Taniel tòa tī Babúlông ê kiongtêng lāité, Ichekel chiūsī tī liûbông Babúlông ê Iûthài lâng tiongkan chò sianti. Ichekel sī chèsi, iū koh sī sianti.

Ichekel chitê miâ ê ìsù sī, "SiōngChú ittēng kakiông, kiankò͘". Konggoân chêng 593 nî ê joa̍hthiⁿ（Iôtah kokông Ehō͘iákin siūlia̍h ê tē 5 nî）, SiōngChú ho͘tiàu Ichekel khaisí chò siúbōngchiá; kengkòe 22 nî chò sianti ê kangchok, Ichekel tī konggoân chêng 571 nî chhunthiⁿ ê Saⁿ Goe̍h 16 ū kìsu̍t siōng bóe ê chi̍t pái īgiân. Ichekel thuichhek kakī khólêng sī tī īgiân kiatsok liáuāu bô gōa kú to̍h ē līkhui sèkan, to̍h sī konggoân chêng 570 nî chóiū to̍h síbông, m̄koh sèngkeng tiong bô siongkoan ê kìchài.

Ichekel só͘ lâu lo̍h lâi ê īgiân to̍h sī Kūiok ê Ichekel su. Tī Ichekel su 36：26–27 chat（chù 1）, SiōngChú tùi Iûthài îbîn kóng, "Góa mā tio̍h sù hō͘ lín chi̍tê sin ê sim, kā sin ê lêng khǹg tī lín lāibīn, koh tùi lín ê jio̍kthé tiong tûtiāu chio̍h sim, sù hō͘ lín bah sim. Góa ittēng ē kā Góa ê lêng khǹg tī lín lāibīn, hō͘ lín sūnchiông Góa ê lu̍tlē, kínsiú chunhêng Góa ê tiánchiong." Chit tōaⁿ ōe chinchiàⁿ sī puttekliáu ê chi̍t tōaⁿ ōe, ūitio̍h chionglâi Siniok sîtāi sìntô͘ ê "Sènglêng lāi（éng）chū" ê hiānsiōng chò khengkhiang ū la̍t ê īgiân!

Chit tōaⁿ ōe ê chúiàu chongchí sī teh soankò, ū chi̍t kang SiōngChú ē kā Iûthài îbîn （iā to̍h sī īsī Siniok sîtāi ê Kitoktô） ê lêng kah sim lóng ōaⁿ tiāu, hō͘ sìntô͘ ētàng ū sin ê lêng kah sin ê sim.

Chit tōaⁿ ōe ū nn̄gê tiōngtiám ta̍ttit chù’ì, chi̍tê sī SiōngChú pēng bô kóng beh póliû sìntô͘ kū ê chio̍h sim tòngchò kìliām, á sī beh kā I "tûtiāu", kā i ōaⁿchò chi̍tê ū hoeh ū bah koh khéng ho̍kchiông I ê sin sim. Nn̄g sī SiōngChú mā bô kóng beh sù hō͘ sìntô͘ kîkî-koàikoài ê lêng, khiok sī kā I ê lêng（Sènglêng）sù hō͘ sìntô͘, hō͘ sìntô͘ ētàng ho̍kchiông lu̍thoat kah kàibēng; tongjiân SiōngChú mā bô kóng chionglâi beh siuhôe I ê lêng, á sī beh hō͘ chiahê bat pōepoān I ê lâng itti̍t chaiiáⁿ hoánséng, ētàng itti̍t thóià kakī, kiànsiàu sià bīnchú, itti̍t giâmsiú lu̍thoat kah kàibēng.

Ichekel ê chit tōaⁿ SiōngChú ê īgiân, kîsi̍t íkeng ūitio̍h āu lâi Kitoktô ê "Sènglêng lāichū" íki̍p liáuāu ê "chio̍h sim piànsêng bah sim" kah "jīnchōe hóekái" ê sioliânsòa si̍tchè lōechāi thégiām hiānsiōng chò kántan ê īkò. Tng lán Siniok Kitoktô ētàng ū Sènglêng lāi（éng）chū liáuāu, kohchài tńglâi khòaⁿ chit tōaⁿ kengbûn ê sî, chiah chaiiáⁿ chit tōaⁿ kengbûn íkeng kā Sènglêng lāi（éng）chū ittēng ē tòa lâi "chio̍h sim piànsêng bah sim" kah "jīnchōe hóekái" chò chi̍t chióng huisiông si̍tchāi ê īgiân, Siniok ê Kitoktô mā khò tio̍h chit chióng hoatchek, siōng bóe chiah ētàng tittio̍h éngoán ê oa̍hmiā. Ichekel ê chit tōaⁿ chákî īgiân sī ánchóaⁿ hiah chengchún kah oa̍hthiàu, kìm bētiâu hō͘ lâng hoatchhut chànthàn!

Chù 1：Khoktōa lâi khòaⁿ, Ichekel su 36：26–32 cheh chôanbûn sī ánne, "Góa mā tio̍h sù hō͘ lín chi̍tê sin sim, kā sin lêng khǹg tī lín lāibīn, koh tùi lín ê jio̍kthé tiong tûtiāu chio̍h sim, sù hō͘ lín bah sim. Góa ittēng ē kā Góa ê lêng khǹg tī lín lāibīn, hō͘ lín sūnchiông Góa ê lu̍tlē, kínsiú chunhêng Góa ê tiánchiong. Lín ittēng tòa tī Góa só͘ sù hō͘ lín lia̍tchó͘ ê tē. Lín beh chò Góa ê chúbîn, Góa beh chò lín ê SiōngChú. Góa ittēng kiù lín thoatlī itchhè ê lâsâm, mā ittēng bēnglēng ngó͘kok hongteng, bô beh hō͘ lín chosiū kihng. Góa ittēng hō͘ chhiū'á kiat kóechí chēchē, chhânhn̂g chengka thó͘sán, thang hō͘ lín bô koh inūi kihng lâi siū gōapang lâng ê bújio̍k. Hit sî, lín ittēng tuisióng lín ê okhêng kah lín putsiān ê chokûi, to̍h ē inūi lín ê chōekò kah thang hūn ê tāichì thóià kakī. SiōngChú kóng, “Lín ē chaiiáⁿ, Góa chit chióng kiâⁿ m̄sī ūi tio̍h lín. Isulael ke ah, tio̍h ūi kakī ê hêngûi lâi kiànsiàu sià bīnchú."

──2021, 04, 05 tah tī "Kitokkàu Thongsìn"