《宋澤萊新著《天路拾穗》TOJ/台灣字版》 |
 |
 |
|
 轉寄 |
Chútê 15："Paktó͘ ho͘khip honggiân（lênggí）kîtó hoat" sī siáⁿmi̍h?
作者 Sòng Te̍klâi 2026.06.14
Tējī pō͘ Sènglêng Koànak
Chútê 15："Paktó͘ ho͘khip honggiân（lênggí）kîtó hoat" sī siáⁿmi̍h?
Góa bat siá chi̍t phiⁿ kiòchò “Sînkî ê honggiân（lênggí）kîtó ipēⁿ kì” ê bûnchiuⁿ, bat tah tī "Kitokkàu Thongsìn" blog ni̍h; hit phiⁿ bûnchiuⁿ ū hùtài soatbêng chi̍t chióng si̍tiōng sèng ê honggiân kîtó hoat.
Itpoaⁿ lâi kóng, honggiân kîtó chóng sī chin tasò, nā m̄sī tāike chūhōe chòhóe, píchhú kó͘lē, lán chin chió lâng goān’ì chò honggiân kîtó. To̍h sī hō͘ kakī goān’ì tanto̍k chi̍tê lâng chò honggiân kîtó, mā ē kámkak thiám, chhaputto pòaⁿ tiámcheng to̍h bô la̍t kohchài kèsio̍k kîtó à. Só͘í lán tio̍h chhōe khòaⁿ tó chi̍t chióng píkàu khah khinsang ê honggiân kîtó hoat, ētàng hō͘ lán bē kámkak thiám, siōng hó sī chi̍t kang 24 tiámcheng kiâⁿ khiā chē khùn sûisî lóng ētàng sihêng ê honggiân kîtó hoat. Góa hoatkiàn ū chi̍t chióng chin līpiān ê honghoat, thang tī kiâⁿ khiā chē khùn（sīmchì kangchok）ê sî, lóng ētàng khinsang chò honggiân kîtó. Lán thang chhengchò "paktó͘ ho͘khip honggiân kîtó hoat".
"Paktó͘ ho͘khip" sī chin chē lâng lóng ēhiáu chò ê, chíiàu chhiùⁿ kòe koa ê lâng, lóng chaiiáⁿ siáⁿmi̍h kiòchò paktó͘ ho͘khip hoat, iā to̍h sī ēng paktó͘ khiok m̄sī ēng hengkhám khòngchè ho͘khip kah siaⁿliōng ê honghoat.
"Paktó͘ ho͘khip honggiân kîtó hoat" ê honghoat sī：1, Seng chò kúi ē paktó͘ ho͘khip; 2, Liáuāu tn̂gtn̂g khip chi̍t kháu khùi（iáu mài chò honggiân kîtó）; 3, Ûnûn'á thó͘khùi, tī thó͘khùi ê sî chiah chò honggiân kîtó, kā lí ê kîtó sû ûnûn'á phòeha̍p thó͘khùi kóng chhut lâi; 4, Liáuāu kohchài tn̂gtn̂g khip chi̍t kháu khùi（iáu mài chò honggiân kîtó）; 5, Ûnûn'á thó͘khùi, tī thó͘khùi ê sî chiah chò honggiân kîtó, kā lí ê kîtó sû ûnûn'á phòeha̍p thó͘khùi kîtó chhut lâi ……. Ánne chi̍t piàn koh chi̍t piàn lâi chò paktó͘ ho͘khip kah chò honggiân kîtó. I ē hō͘ lí liāusióng bē kàu ê sóngkhoài kah hāukó.
I ê hāukó siōngchió paukoat ēkha kúi tiám：
1) Thang kiâⁿ khiā chē khùn lóng chò honggiân kîtó;
2) Thang sùnkan to̍h pàngsang kakī, chaiiáⁿ siáⁿmi̍h kiòchò "tháupàng", mā tháupàng só͘ū siūⁿ beh hoānchōe ê sim, pílūn kóng hùnnō͘, m̄ siàbián, oànhūn, tò͘khī, siâîm, okkháu, kíntiuⁿ, chhausim, bōngsióng ……ê chêngsū;
3) Hō͘ lâng itti̍t siūⁿ beh tha̍k "sèngkeng";
4) Kámkak kah SiōngChú tôngchāi;
5) Chaiiáⁿ "sìn góa ê lâng, to̍h kahná sèngkeng só͘ kóng ê, tùi i ê paklāi teh beh éng chhut oa̍hchúi ê kanghô." chit kù ōe ê chinchiàⁿ hâmì.
6) Póchhî hiate̍k ê hâmiông liōng, ū oa̍hle̍k. Khósioh chin chió lâng chaiiáⁿ chitê pìbi̍t!
──2021, 05, 30 tī Lo̍kkáng
