《宋澤萊新著《天路拾穗》台譯版》

 | | | 轉寄

第二部：聖靈灌AK_27【題目】聖靈kám 無醫非基督徒ê病症？

作者 宋澤萊 2026.09.06






27【題目】聖靈kám 無醫非基督徒ê病症？


Chit項tāichì mā發生tī 2004年左右，仝款是陳仁宗牧師、王世勛兄kah成德兄夫婦tiāⁿ來阮tau做家庭聚會ê hitê時chūn。

Tāichì是ánne：我ê細漢chabó͘ kiáⁿ美舜三歲chìn前ê保母雄雄發生一个病症，m̄知爲啥物，chit位已經五十gōa歲ê保母雄雄手骨ê骨頭破裂，狀況koh非常嚴重。應該講chit種骨斷去kah老年骨骼疏鬆症無關係，純粹是先天性骨骼容易斷ê原因所造成。

美舜tī三歲chìn前，lóng是chit位保母一手養大ê。當時，阮夫妻ê校務真無閒，koh一定tio̍h養育長男耿儀、長女婉婷，事實上已經無時間kah心力親手koh再照顧chitê嬰á。所以美舜三歲chìn前，暝日差不多lóng tī保母ê厝，tio̍h算兩歲以後上幼稚園，mā lóng由保母chhōa她去學校讀冊，kantaⁿ tī拜六kah禮拜日，阮chiah抱她tńg到厝來。好佳哉，保母ê厝to̍h tī阮tau附近，日常阮夫妻iáu ētàng常去看美舜。Ánne到三歲足，美舜chiah離開保母ê厝，完全tńg來阮ê厝。所以保母kah阮一直維持真好ê關係，tio̍h算到美舜十歲左右ê 2004年，阮iáu是往來無停，差不多to̍h是一家人，美舜總是kā保母當做她ê「阿媽」來看待。

當我聽講保母骨斷去ê時，to̍h真替她煩惱，因為年紀大ā，chit種病koh khah有威脅性。

我kah仁宗牧師、世勛兄隨時就行到保母ê厝，想beh替她祈禱。

當阮踏入去保母ê厝，世勛兄to̍h搖頭，因為伊看tio̍h保母ê厝ê大廳，pái一大堆插令旗ê偶像，iáu有神秘ê符咒koânkoân掛tī頂面，一時mā算bē清，看起來真奇怪。世勛兄神秘笑笑á kā我講：「按照我ê觀察，若是一个家庭供奉三个偶像以上，chitê家ê麻煩to̍h大loh！」原來，保母ê翁婿tú好是附近一間廟寺ê委員，對hit間廟寺貢獻真chē心力。

M̄koh，牧師kah世勛兄iáu是替她做祈禱，只是感覺無hiahni̍h樂觀。

M̄koh，我iáu是存ǹg望ê心，因為保母並無拒絕阮為她祈禱，to̍h是她ê翁婿mā iáu是恬恬准阮ánne做，in無排斥阮ê好意，互相比較台灣民間對基督教ê態度，這已經是真難得！

Tī hitê有真chē偶像ê大廳內底，我kā保母講：「我ē繼續替妳祈禱。」 我m̄是隨便講講leh，當時，我當teh閱讀有名ê神跡醫病專家溫約翰牧師ê冊，知影連續祈禱對病症ê大威力，日常mā養成做連續祈禱ê習慣。一旦我下決心beh為某人做祈禱，我to̍h bē hiahni̍h容易停止。

我利用ta̍k工黃昏點半鐘ê散步時間為保母祈禱，只要我散步，我to̍h無停連續祈禱。同時，tī平常ê學校下課時刻，我mā ē走去in tau替她做祈禱。Tī祈禱ê時，我ē kā保母ê名、病症重複講一遍，然後期望耶穌、聖靈kah她同在，kā她ê病症醫好。

事實上，tú開始ê時，我看bē出上主介入chitê醫病。因為保母mā kakī去病院做治療，而且已經phah石膏，tio̍h算我無祈禱，看起來病mā是慢慢得tio̍h醫好。

M̄koh，祈禱幾工了後，有一pái tī學校上完課，teh beh中晝à，有kóa thiám，我tùi教室tńg來導師歇睏室。To̍h tī一欉樹kha停止腳步，因為有一个異象出現tī我ê面前。

He是一个類似一片雲霧tùi山間飄出來ê白色雲煙，雄雄勻勻á進入我ê眼內。Hit片雲煙一直向前搬sóa，無gōa久我to̍h看tio̍h保母ê厝kah hit條巷á，hit片雲煙竟然tùi保母ê厝飛入去。Teh進入保母ê厝chìn前，雲煙hō͘我感受tio̍h一个hō͘ 我m̄敢想像ê感受：上主顯示祂無比深lònglòng ê卑賤。我看tio̍h hit片雲煙，感覺祂to̍h是萬物siōng底層ê物件，mā是siōng深地帶ê物件，koh khah án怎都無比祂koh khah是底盤ê物件à。祂m̄是萬物，却是所有萬物siōng底層ê接載物。換話句來講，若是tio̍h講卑賤，無任何物件比祂khah卑賤，若是tio̍h講宇宙萬物排列有一个深度，無任何物件比祂所khiā ê地位koh khah深。萬物若是無祂ê扶持，萬物to̍h ē崩敗。祂kahná對我表示，因為我ê祈禱，準講chitê婦人m̄是基督徒，koh供奉真chē偶像，祂mā願意醫她ê病症，因為祂本來to̍h懷抱她。祂一屑á都無回顧，直接進入保母ê厝裡去à。

我驚一tiô，差不多m̄敢相信我所看tio̍h ê。

M̄是因為聖靈beh醫保母hō͘我驚疑，是她ê極端謙卑ê本質嚇驚tio̍h我。我發見大pān ê上主，竟然謙卑kahná親像一个siōng下層ê護士，lóng無異議都去醫chitê 無信祂ê婦女，koh m̄是責備，mā無怨言；我to̍h講：「主ah，像祢chit種，我永遠lóng做bē到！」

異象消失了後，我隨時走去車棚，騎otobái去保母ê厝。我趕緊替她做一个感謝ê祈禱，我kā保母講：「我tī祈禱中發見上主beh kā妳醫治，無gōa久了後，妳ê病to̍h一定ē得tio̍h醫好！」

果然，無真長ê一段日子了後，保母to̍h拆掉石膏，骨斷去得tio̍h醫好。 了後，有幾nā pái，我繼續為她祈禱ê時，lóng勸保母kah她ê厝裡ê人應該改信基督教。M̄koh厝內人只是笑笑á，並無beh信上主ê意思。

後來，我無koh為保母祈禱，事實上mā無需要我祈禱à。

M̄koh幾個月了後，保母koh一pái poa̍h倒，chit pái ê骨斷去是tī大腿骨。

Chit pái，我to̍h無有閒kah氣力為她祈禱à。

Chitê神跡teh說明啥物？to̍h是teh kā咱講，上主mā願意為非基督徒醫病，只要祈禱，tio̍h算m̄信祂ê人，mā ē領受祂ê恩典，祂扶持所有ê人，負擔所有ê人。M̄koh，世間人總是無明瞭上主ê善意，oa̍t頭to̍h koh khah án怎都bē認得上主à！

後來，我一直ē記得chitê異象kah神跡，m̄敢ka小khóa bē記得，m̄是遺憾保母無法度信上主，因為這是全靠上主ê決定；卻是感覺上主ê謙卑hō͘我無法度想像。一直到今á日，我lóng iáu m̄知上主有gōa謙卑，to̍h親像馬丁路德講ê：「聖靈ná親像一个深淵。」意思是講咱永遠oh得測量祂ê長闊高深lah！

──2010、07、19貼tī《基督教通訊》