《宋澤萊新著《天路拾穗》台譯版》

 | | | 轉寄

第二部：聖靈灌AK_24【題目】基督徒kám ētàng食祭拜過ê食物？

作者 宋澤萊 2026.08.16




24【題目】基督徒kám ētàng食祭拜過ê食物？


2004年五月chìn前，為tio̍h我ê受洗，牧師陳仁宗兄、前立委王世勛兄、成德兄kah秀英姐翁某毎隔兩禮拜，to̍h ē到阮tau來。大家彼此探討《聖經》ê道理，唱一kóa好聽ê聖歌。阮共同分享tī基督裡ê喜樂平安，而且經歷基督內面ê真chē奇蹟。無憢疑ê是，hit時kantaⁿ講是我信仰過程中siōng美麗ê時刻。

有一pái，阮講tio̍h基督徒kám ētàng食祭拜過ê物件。我講大概bētàng hòⁿ？凡若祭拜過ê食物除了已經無新鮮以外，tī有信仰ê人看起來，恐驚mā是無清氣ê。我ê意思thang簡單濃縮為：「鬼類所食過ê物件，基督徒爲啥物beh去bak tio̍h leh？！」M̄koh仁宗牧師隨時講ētàng食，而且phah開聖經，the̍h 來我ê眼前講：「聖經是ánne寫ê。」我to̍h看tio̍h〈羅馬書〉十四章13─23節，保羅ánne講：「我憑kah主耶穌ê密切關係知影，食物本身lóng是清氣ê……一切ê食物lóng ētàng食。」我一看，大驚一tiô，想bē到保羅ē ánne講，而且因為ánne，tī心內對保羅開始氣chhoahchhoah！

原來，我tī 1990年左右teh教冊ê國中，向一位「地方聚會所」ê同事承認「我ētàng相信耶穌死去koh活」了後，真chē ê奇怪tāichì一直發生。我ētàng tī日時頭經歷tio̍h koân大ê聖靈tī我ê背後臨在三工tahtah；tī眠夢中看tio̍h真chē壯大koh súisúi ê「異夢」景象； ētàng經過聖靈tī眠夢中為我kui身軀ê罪惡行洗禮；ētàng經過耶穌ê手一目nih久to̍h kā我ê病痛終止……中間iáu有一kóa心理上chiok深刻ê改變：

一个是我開始驚蛇類。Chìn前tī 未信耶穌ê時，我是m̄驚蛇ê。自細漢tī田裡，to̍h遇tio̍h真chē蛇類，kah一般gín'á仝款，to̍h是m̄驚in，m̄管水蛇、龜殼花、雨傘節，往往有看kahná無看，甚至當場kā in刣死。我iáu tī菜市á食過蛇肉，感覺氣味bē bái。M̄koh自1990年了後，我對蛇有另外一个種感覺，只要一想起蛇，kui身軀to̍h bē爽快，真想beh離蛇遠遠ê，jú無關係jú好；總講一句to̍h是無想beh看tio̍h它、想tio̍h它。有tang時á ē tī電視頂面看tio̍h蛇類ê影片，tiāⁿtiāⁿ隨轉台m̄看。我m̄知基督徒是m̄是一定tio̍h驚蛇，mā無問過別人；m̄koh假使有基督徒講伊m̄驚蛇，iáu ētàng親近蛇，我一定ē欽佩伊，因為tī我ê眼中，伊實在chiok勇敢！

另外一个是我m̄食祭拜物。我tī gín'á kah青年時代是無khiànsńg食祭拜物ê，tú tio̍h年節á á是大拜拜，lóng是大食大lim，根本bē想tio̍h啥物祭拜物，to̍h是清明pōe墓了後ê食物，照食不誤。M̄koh，tùi 1990年起，m̄知爲啥物，凡若看tio̍h有人拜拜to̍h感覺真怪，kohkhah免講食hit kóa祭拜過ê物件。Goán老母是真kah意拜拜ê，我無辦法kā她糾正，mā是無法度kā她苦勸；m̄koh只要她kā拜完ê食物phâng到我ê面前，使弄我食，我to̍h行去遠遠ê所在。我坦白kā她講：「M̄食祭拜物，一點點á都m̄食！」她當然無歡喜，m̄koh我chiah bē掛（khòa）意她ê無歡喜；我感覺食了祭拜物，等於是反叛了kakī ê良心！Tī其它ê場合，我猶原堅持chitê原則，凡若知影食物是拜過ê，我絕對m̄去kha̍p tio̍h它。Chitê習慣到2004年已經14年ā，照常無變。

簡單來講：我知影，驚蛇kah m̄食祭拜物，to̍h是聖靈tī我身軀頂火印做記號。

Chìn前，聖靈iáu未臨到ê時，我是啥物lóng ētàng亂來hit pêng ê人；聖靈臨到以後，我已經是有戒條chit pêng ê人。M̄是我kakī beh ánne改變（我chiah無力量做chit種改變），是聖靈hō͘我變成chit種。既然是ánne，我ná tio̍h違反聖靈對我所做ê改變？驚蛇kah m̄食祭拜物並無hō͘我任何ê pháiⁿ處，顛倒是好處iáu bē少，至少提醒我án怎避開毒蟲kah鬼類ê侵襲，這是真好ê。

我所以對保羅不滿，除了伊chitê唐突ê教導bē合我tī聖靈裡ê體驗以外；另外一个因素是我對早期使徒時代ê基督徒m̄食祭拜物ê原始規定有一kóa了解：tī使徒時代，福音開始由偤太人傳hō͘外邦人ê時，bat tú tio̍h某一kóa偤太人ê責備。當保羅kah巴拿巴宣教來到安提阿ê時，有kóa偤太人ê基督徒to̍h要求外邦人ê基督徒tio̍h接受割禮，iáu恐嚇chiahê外邦人ê信徒講無受割禮to̍h bētàng得救。保羅kah巴拿巴當場就kah chiahê偤太人基督徒大嚷起來。Siōng尾所有ê信徒to̍h決定，請保羅kah巴拿巴來耶路撒冷總教會，去見眾使徒kah長老，請耶路撒冷總會決定外邦人是m̄是一定tio̍h受割禮chit項tāichì。保羅kah巴拿巴來到總會了後，to̍h kā chit項tāichì報告hō͘上級ê眾使徒聽。總會ê眾使徒kah長老聽了，先由耶穌ê小弟雅各提議m̄免要求外邦人一定tio̍h受割禮，m̄koh是tio̍h遵守四个誡條。雅各講：「咱應該寫phoe，吩咐in bēsái食祭過偶像ê無清氣食物、bētàng有淫亂ê行為，bēsái食摧死ê chengseⁿ kah血。」了後，眾使徒、長老kah全教會ê會眾lóng同意，to̍h koh差派保羅、巴拿巴kah耶路撒冷總會裡ê ê人士偤大、西拉去安提阿聲明chiahê決定，安提阿ê偤太人信徒kah外邦人信徒，終其尾重修舊好﹝註1﹞。

你看！耶路撒冷ê總教會是有「m̄准食祭拜物」chitê規定，而且保羅iáu當眾人宣布過！是án怎到寫〈羅馬書〉ê時，你kakī koh無服從規定，主張「一切ê食物lóng ētàng食」？這kám m̄是真無守法ê行為？Mā是對耶路撒冷總教會ê thiau故意藐視！

我jú想保羅chit種行為，to̍h jú受氣，感覺chitê人真正是莫名其妙，到底tī亂chhòng kóa啥物！我私底下nga̍uhnga̍uh念，對保羅ê行為真無ka掠做是當然，感覺伊無夠thang信賴，大主大意ê主張，無法度……。%

無想tio̍h，to̍h tī hit暗，我做一个「氣勢」chiok驚人ê「異夢」： 我m̄知異夢是啥物時chūn發生ê，kiámchhái是teh beh天光ê時，因為醒來ê時，天色已經拍phù光à。

Tī hit pái ê睏眠中，我雄雄先感覺真燒熱﹝事實上當時睏房當teh放冷氣﹞，péng來péng去，m̄koh無有能hō͘我醒來。續接，我感覺頭殼頂面有蒸氣仝款ê熱流罩tiâu落來，非常ê燒熱，thang hō͘人kui个頭汗chho̍pchho̍p流ê hit種熱氣降臨落來，一下á，kahná整個頂半身lóng進入高溫ê蒸氣室內面仝款。了後，烏暗ê天頂雄雄露出一个所在有光ê區塊﹝kahná iáu有一个圓月﹞，夢中ê我giú長頷頸，頭部向天，to̍h kahná一隻對圓月噑噑叫ê野狼仝款，開始發出單音節ê方言﹝註：我ê方言有兩種，一種是單音節ê舌音，是仝款ê一个單音快速唱出，是oló敬拜用ê；另外一个種是講kah躼躼長，ná親像咱ê日常語言，kantaⁿ有語言裡有真chē ê舌音，是一種講道式ê語言﹞，聲音非常大聲高旺（koōng），時間維持非常久長，m̄koh我感覺m̄是靠tio̍h kakī ê力量發出來ê，卻是受tio̍h某種力量ê牽引叫出來ê，總講一句to̍h是一種非常高旺（koōng）ê敬拜叫唱。了後，天頂完全被phah開，就出現了一本真大ê冊，一頁一頁自動掀開，內面全是希臘文，可惜我m̄ bat希臘文，m̄知它到底寫啥物；m̄koh本能知影，he是保羅ê所有書信﹝包括無tī《聖經》內面ê所有書信﹞，看起來份量真大，絶對m̄是《聖經》裡少少hit幾篇niâ。我知影聖靈ê意思是beh kā我講，保羅ê書信不只是我所看tio̍h ê hit幾篇，伊tī其他書信裡講tio̍h ê道理﹝包括kám thang食祭拜物ê問題﹞，不只是我所看tio̍h ê hit kóa篇章，我chitmá所ētàng看tio̍h ê只是保羅少少hit幾話句而已。我tī眠夢中感覺真燒熱，一直péng來péng去，一直看tio̍h hit kóa無法度 bat ê書信，時間維持非常久。了後，我koh聽tio̍h聖靈長長ê吐大氣聲﹝chìn前，我前到taⁿ m̄ bat聽過聖靈ê吐大氣﹞，ná吐大氣聲厚重溫柔，kahná 廻音ētàng進入我ê心內siōng深ê所在，有一種真大ê安慰作用，聽起來真爽快。祂tī感嘆保羅有不得已ê苦衷，保羅講ê話定著是t不得已ê情勢下講出來ê，伊有伊ê難處tī leh。意思是hō͘ 我m̄免過分注意，mā m̄免苛責。何況保羅ánne講mā有伊實際ê需要，凡若知影實況ê人，都bē譴責保羅ê。我tī hi̍t个吐大氣聲中浸入去真久，受tio̍h真大ê安慰。了後，就醒來，天色差不多是天光à。

我醒來，了解異夢所beh傳達ê大部分意義﹝按照過去我ê經驗，beh ē完全了解異夢ê所有無重要ê細節ê意義是不可能ê﹞。伊ê重點iáu是落tī「信徒kám thang食祭拜過ê食物」以及「保羅對食祭拜物ê真正看法」chit兩點。對前者，聖靈並無hō͘我固定ê解答，tī整個異夢中，聖靈ê態度lóng是極端溫柔ê，祂m̄是一般ê教條主義者，只有講「thang」á是「m̄thang」，卻是避開chit種論斷，由我kakī來決定；chit種寬容ê態度，是我tī基督教界裡真少看tio̍h ê。對後者，聖靈ê啟示比較khah chē，祂明顯kā我講，保羅真正意思我是無法度了解ê，因為經文siuⁿ少，我無辦法看tio̍h保羅bat寫過，無tī《聖經》裡ê其他書信。大慨意義就是ánne。

其實，我後來phah拚查考聖經ê文字，發見保羅講：「一切ê食物lóng thang食。」Chit句話，無一定是用來談「祭拜物kám ētàng食」chitê主題ê。換話句講，保羅所講ê「食ê範圍」可能包括祭拜物，mā可能無包括祭拜物。仁宗牧師the̍h hō͘我看ê〈羅馬書〉整個十四章裡ê文字，tāi先是講tio̍h：「有信心ê人，啥物物件lóng thang食；信心軟chiáⁿê人；kantaⁿ食菜蔬﹝註2﹞。」後來koh講tio̍h：「一切食物lóng thang食，m̄koh若是你所食ê hō͘別人踏差，he to̍h m̄ tio̍h à。所以，siōng好m̄食肉，不lim酒，m̄做任何hō͘你兄弟踏差ê tāichì。﹝註3﹞」 。重點kahná是落tī「信徒應該食酒肉á是食菜蔬」ê問題頂面，卻m̄是khǹg tī「祭拜物kám ētàng食」chitê問題頂面。M̄koh，tī其他文字裡mā出現了「食物本身lóng是清氣ê；若是有人叫是它無清氣，ánne，對這個人來講，它to̍h是無清氣ê à。﹝註4﹞」chiahê話，thang hō͘人叫是保羅是teh談祭拜物。無論án怎，整個十四章ê文字，可能m̄是談祭拜物ê，mā可能是談祭拜物ê，兩者lóng有可能。

M̄koh，無論是m̄是談祭拜物，保羅kah聖靈仝款並無做出一个教條式ê論斷。保羅認為食m̄食lóng無所謂，無應該成做問題。伊講：「有人啥物物件lóng食，mā是表示伊對主ê尊崇，因為伊爲食ê食物感謝上主。有人m̄食某種食物，仝款是表示對主ê尊崇，mā感謝上主﹝註5﹞。」

所以假使講是談「kám thang食祭拜物」，tī保羅ê態度來講是開放ê，lóng是ētàng ê。Ánne chiah是經文ê實際所指！當然，《聖經》mā收集有保羅ê另外一封書信，tī hia mā講tio̍h kám thang食祭拜物ê tāichì，m̄koh開放ê態度猶原ánne。

Chitê異夢，化解了我kah保羅之間ê緊張，確保我對「保羅書信」ê信心，對我來講，是一个真重要ê異夢。

同時，koh khah重要ê是：我了解「保羅書信」ê重要性，chiahê書信m̄是表面ê簡單言談，tī chiah个書信ê背後，有聖靈做背書，所談ê內容大部分lóng符合聖靈ê意思；換話講，「保羅書信」差不多to̍h是聖靈親身ê言談。 Tńg來siōng頭前來講：

Ánne自從經歷過chitê異夢了後，我kám有改變習慣食祭拜物？無！我到chitmá猶原m̄食祭拜物，只是對食祭拜物ê基督徒無koh責備而已。我本人猶原堅決絕對無beh食祭拜物，因為he是聖靈對我ê siōng明顯ê ù印！ —2010、05、30 tī鹿港tòa ê所在

﹝註1﹞見《使徒行傳》十五章。
﹝註2﹞見羅馬書十四章2節。
﹝註3﹞見羅馬書十四章20－21節。
﹝註4﹞見羅馬書十四章14節。
﹝註5﹞見羅馬書十四章6節。