《宋澤萊新著《天路拾穗》台譯版》

 | | | 轉寄

自序：一本書寫靈命成長四階段kah種種神跡奇事ê冊！

作者 宋澤萊 2025.11.23

自序：一本書寫靈命成長四階段kah種種神跡奇事ê冊！

0.《基督教通訊》blog簡介

《天路拾穗》chit本冊thang講是網路《基督教通訊》blog ê一pái重要展示。

自從十三年前（2010年）我to̍h kah台灣文學家胡長松tī網路頂開辦《基督教通訊》blog，目的是beh提供一个園地thang hō͘無分教派ê基督徒來書寫in ê靈修經驗，彼此thang互相學習。

大概是因為未開辦chìn前，我已經tī神所hō͘ in ê異夢中知影ē有chitê blog ê誕生，所以十三年來，阮ê blog進行kah非常順利，雖bóng內面bē少有利劍劍ê批判性文章出現，m̄koh從來無發見有人對blog有負評，甚至任何惹事端ê回應lóng無出現過，ēsái講是一帆風順。本來加入討論ê成員kantaⁿ有二、三十位，後來koh再增加到百gōa位，差不多已經來到一間中型教會ê教徒人數， bētàng算是一个小型ê blog à。阮ê成員甚至包括信義會ê陳仁宗牧師、長老會ê康來昌牧師、王貞文牧師以及榮光教會ê賴星智牧師。

同時阮blog ê某一kóa文章ê點閱率siōng koân也bat達到一萬八千个ê數目。講tio̍h blog chit種網頁，它ê文章kah面冊無相仝，通常lóng是用文字為主，篇幅koh khah長，敘述koh khah chē，願意閱讀blog文章ê人lóng有伊ê特別ê素養kah目的。所以一萬八千个點閱率bētàng算少，這mā是接載tio̍h阮blog ētàng一直存在ê siōng大原因，它結局iáu是真有影響力。

因為阮一開始to̍h有表明，chitê blog是一个靈修ê園地，所以成員á是讀者lóng知影這是一个公開談基督教私密經驗ê所在，是teh講求實修。所以tī blog內面所發表ê文章to̍h真少是「依經解義」ê文章，hit kóa照本宣科、一屑á都無實際個人宗教經驗ê表面文章，to̍h真少出現tī阮ê blog裡，hō͘阮避開一般口號傳教ê通俗性，大大減少blog ê文字負擔。既然是ánne，貼tī blog ê文章有大量lóng是書寫神ê奇蹟奇事ê文章，因為直接接觸神ê經驗本身to̍h是神跡奇事！

我mā tī 2010年開始tī《基督教通訊》blog寫文章，到十三年了後ê今á日，總共寫220篇左右，算是真龐大ê一个數量à。Chitmá我選錄內面ê 96篇文章，kā它做有秩序ê編輯，就ánne構成chit本《天路拾穗》ê冊à。

1.書寫「稱義得救」

Tú tī blog發表文章ê時，我to̍h先問kakī講：到底beh寫啥物？Hit時，我已經m̄是對基督教完全無認bat ê人；冊桌á頂已經累積有幾个版本ê《聖經》，mā看過馬丁路德ê〈羅馬書〉釋經冊kah加爾文ê《基督教要義》，mā買幾套系統神學ê冊phah拚閱讀過，後來iáu伸長到閱讀古早時代教父ê思想書籍，iáu有真chē基督教名人ê論著。假使講beh寫一kóa依經解義ê文章，對我來講並無困難。M̄koh頭前我已經講過，阮辦blog ê原意並m̄是ánne，是beh書寫個人靈修ê真實體驗，也to̍h是來自神ê直接體驗。所以kakī對依經解義ê書寫並無感覺興趣，甚至對馬丁路德、加爾文ê論著，甚至任何名人已經有ê論述siōng好lóng khǹg入去括弧，存起來無beh論述。我一定tio̍h向現象學ê學者學習，書寫kakī來自神ê直接所感kah所見。

我是有一kóa直接接觸神ê經驗ê人之一。早tī 1990年（38歲）左右，因為有人問講：「你信á是m̄信耶穌死去koh活？」Tī突然無提防之下以及快速ê思考中，我回答伊講：「我…ētàng…相信。」結果to̍h親像看電影仝款，直接看tio̍h耶穌tùi目chiu前行過，hō͘ 我大驚一tiô，就ánne明白耶穌猶原存在tī chitê宇宙ê中間，而且祂mā有回答講祂ê koh活是無thang懷疑ê事實，hō͘我對耶穌ê認知成做一種具體印象，並m̄是一般人抽象ê玄想，我就ánne堅固了信仰ê根基。無gōa久以後iáu tī異夢中看tio̍h耶穌兩pái，lóng kah醫病有關，koh khah hō͘我對耶穌有直接ê體會。所以kakī to̍h想beh翻頭去寫kóa án怎「改宗信耶穌」ê方法chit項tāichì；因為它真重要，是信仰ê開端。M̄koh，我並m̄是ētàng完全知影真chē人是án怎改宗信耶穌；tī改宗信耶穌ê方法五花十色ê今á日，每人lóng有伊獨有特殊ê一套，若beh廣闊來搜chhōe chiahê方法，可能幾十篇to談bē完。所以kantaⁿ ētàng寫kakī siōng熟sāi ê改宗信耶穌ê方法，也to̍h是「信耶穌死去koh活」ê chitê經驗kah方法，來hō͘讀者參考。假使有人ētàng照chitê辦法執行，ánne也ētàng收tio̍h我kah真chē朋友仝款ê效果。這to̍h是我ê靈命成長ê第一段經驗，mā是《天路拾穗》chit本冊頭一部「稱義得救」ê幾篇文章。

2.書寫聖靈灌ak

除了「稱義得救」以外，iáu有啥物ētàng寫leh？He to̍h是聖靈來臨ê直接經驗。聖靈來臨ê現象比我改宗信耶穌khah慢一kóa，m̄koh kantaⁿ有慢七工左右。也to̍h是當我信耶穌七工了後，聖靈忽然ná親像一座大山，降臨tī身chiūⁿ了後，距離身軀kantaⁿ有十公分左右，tahtah三工三暝，後來我向祂祈禱，祂chiah離開，就ánne to̍h開始有頻繁ê異夢。聖靈ê來臨除了ētàng hō͘我感覺tio̍h以外，後來祂mā tī異象中顯示祂親像雲彩一般ê存在，hō͘我對祂ê印象開始具體起來。真chē忽然來臨ê異夢，目的大多數lóng是為我行洗禮，提往天界， phah開陰間，修正錯誤行為，指示經文，辯證神道，告知他人危機，點tuh未來，顯露神ê本質……thang講有百百種，chiahê lóng是現成ê，ētàng隨時書寫。另外，我後來mā因為念「哈里路亞」學ē曉講方言（靈語）以及tī聖靈ê灌ak之下大講方言，ētàng深刻瞭解講方言ê奧祕；了後，也ētàng教導別人講方言；而且ētàng引起大信心kah醫病ê等等恩賜。凡若chiahê，lóng是siōng熟sāi ê經驗，m̄免參考他人ê經驗to̍h ētàng直接寫出真chē文章。所以tī書寫改宗信耶穌ê經驗中，mā to̍h交雜來寫聖靈降臨ê種種神跡經驗。這to̍h是我ê靈命成長ê第二段經驗，mā是《天路拾穗》chit本冊第二部「聖靈灌ak」裡ê幾篇文章。

3.書寫聖靈內住

因為kakī m̄是一个宗教天才，對屬靈經驗ê領悟並無算真敏捷；同時ētàng領受tio̍h ê聖靈mā是有限。所以自從改宗信耶穌了後，tahtah有23年ê時間，我對神ê直接體驗大概to̍h tī「稱義得救」kah「聖靈灌ak」ê範圍內面teh tńgse̍h，並無koh khah大ê進步，甚至有時chūn iáu有退步ê現象，所以開辦blog了後ê前三年，差不多mā kantaⁿ ētàng寫chit兩種體驗。

M̄koh，來到2013年（61歲），也to̍h是blog開辦ê第三年，忽然聖靈內住到我ê胸腹一帶來ā。Chìn前，聖靈mā m̄是講無，有tang時á來內住過，m̄koh時間lóng真短，隨時to̍h離開。M̄koh 2013年chit pái真無仝款，祂內住了後to̍h m̄ bat離開，也to̍h是講日子一工一工過去，甚至經過了五年、十年 á是koh khah久，m̄koh無論任何時刻，lóng ētàng感知tio̍h祂to̍h是tòa tī我ê胸腹ê某一个點ê位置頂面，一屑á都無離開淡薄á久ê現象，chit點hō͘人感覺真驚奇，我tiāⁿtiāⁿ講這to̍h是聖靈「永」tòa。

Tú開始，隨時感覺硬心ho͘ 軟化à，也to̍h是《以西結書》36章26節所講ê石心變成肉心ê hit種狀況，心ētàng柔軟謙卑落來，ētàng接納chìn前無法度接納ê種種事項，對他人koh khah ētàng設身處地，對kakī ê缺點koh khah ētàng接受。Tī頭起先ê一年內，身心tiāⁿtiāⁿ有平安kah喜樂，而且知影聖靈開始kā聖靈ê果chí ê種種元素賜hō͘我à，聖靈當teh改變我ê內在。這是以前m̄bat有ê感受，為tio̍h這我非常感謝聖靈。M̄koh約一年了後，聖靈顯示祂無比聖潔ê本性，hō͘人了解罪ê大概內容，mā知覺tio̍h kakī內在ê lâsâm，需要認罪悔改。聖靈mā開始一條一條顯露我ê罪行，甚至暴露siōng bē堪得koh永遠bē kakī知影ê大罪，ài我認罪悔改。Chit種狀況，真sêng末日ê審判，一厘絲á ê罪lóng oh得逃閃法網，lóng被暴露。

一般來講，凡若意識tio̍h ê罪lóng ētàng快速改正，m̄koh當來到bihkhǹg ê大罪ê時，難免ē產生抵抗，chit時聖靈to̍h ē phah開恐佈ê陰間大門，kā我chhōa到陰間，去看hit kóa慘況，嚴厲警告tio̍h ài認罪改正，若無，難免墮落到無法度承受ê某一个恐怖ê陰間角落。Ánne，認罪悔改kahná無辦法停止，因為除了舊日ê罪以外，iáu有今á日kah未來ê罪不斷ē產生，ētàng hō͘人感覺萬般無奈，m̄知認罪悔改ê日子究竟beh拖到啥物時chūn chiah停止。慢慢á，我ētàng觀察tio̍h所有ê罪ê根源to̍h是在tī咱ê內在有一个「我」（基督教kā它稱做老我á是舊人）ê問題頂面。講mā奇怪，只要iáu有一厘絲á ê「老我」被察覺tio̍h，所有ê罪to̍h真容易產生，永遠bē終止。To̍h親像講「淫亂、lâsâm、邪惡、拜偶像、行邪術、仇恨、冤家、忌恨、激心、紛爭、衝突、分裂、嫉妒、兇殺、酒醉kah沉淪ê宴席」chiahê罪行，lóng離bē開kakī先有一種意愛kah hò͘ⁿ慾ê老我，chiah引起chiahê邪惡行為。老我明明to̍h是bē振動ê一欉樹á，開滿罪ê花蕊。除非chit欉樹á lian去，花蕊chiah無koh開。Chitmá，tī聖靈ê對照之下，chitê「老我」koh khah變本加厲，koh khah暴露邪惡ê本來面目。Chit時chiah警覺tio̍h「老我iáu未被完全釘死tī十字架頂」，是一件非常驚人ê tāichì，它tī未來終其尾ē kā kakī帶向一个深坑地獄。老我ê存在phah倒我對「因信稱義」ê堅強信心，tiāⁿtiāⁿ kakī心內teh講：「無m̄ tio̍h，凡若保羅kah因信稱義ê信徒lóng ē得救，m̄koh kantaⁿ我bē得救。只要老我iáu存在，to̍h無法度chiūⁿ新天新地，kohkhah免講進入新耶路撒冷聖城，因為耶穌有夠額ê理由拒絕我！」

Tī chitê認罪悔改ê kui个過程裡，聖靈kah愛犯罪ê自我就ánne giú來giú去，亂講爭鬥，兩个無beh相讓。好佳哉，我慢慢á發覺tio̍h「老我」無koh hiahni̍h穩固有力à，它慢慢ētàng屈服tī聖靈下kha，失去犯罪ê能力，穩固ê根柢開始搖動，所ētàng纏tiâu ê內在範圍縮小，人ê內在to̍h開始jú來jú聖潔起來，聖靈已經得tio̍h主宰權。

Tī 3年9個月了後ê某一个暗時，tī一个異象中，我驚一tiô發見ài犯罪ê「老我」chitê主體永遠消失à（mā thang講是hō͘上主取回），聖靈tī胸腹中一變成做唯一ê「新我」，而且大發光芒，超越過去、現在、未來ê時間限制，成做「我是alfa，是omega」hit種存在體，變成新ê性命à！

所以tùi 2013年起，我tī blog加入去聖靈內住經驗ê書寫。這是我靈命成長ê第三段經驗，mā是《天路拾穗》chit本冊第三部「聖靈內住」裡ê幾篇文章。

4.書寫永遠ê性命

我是tī 2017年（65歲）二月得tio̍h永遠ê性命。

得tio̍h永遠ê性命thang講是一種大覺醒。一方面ētàng時時刻刻lóng chhōe bētio̍h hitê ētàng落入陰間、地獄ê主體──「老我」，因為ánne驚輪迴ê hitê心to̍h放落來，mā to̍h bē驚死亡kah死亡以後ê事loh。第二方面有一个永生bē死koh無窮宏大ê性命變成「新我」，ētàng hō͘ kakī kahná隨時lóng處tī永恆ê天堂裡，就ánne感覺身心tiāⁿtiāⁿ存有到taⁿ無人有ê自由自在。第三方面因為明白永遠ê性命是啥物，to̍h ē tiāⁿtiāⁿ想起《聖經》第一卷〈創世紀〉所講ê被封閉tī伊甸園裡bē giàn賜hō͘人ê「性命樹ê果chí」；以及siōng尾一卷〈啟示錄〉裡講beh賜hō͘人ê「性命水」，感覺kakī終其尾讀bat《聖經》tāi先kah siōng尾beh解決ê問題，ētàng正確明白chit本kahná戲劇ê大冊ê siōng大旨意，就ánne貫通kui本大冊，感覺用hiahni̍h chē時間tī信仰上並無白白無去，hō͘人感覺無比樂暢kah安慰！

到今年ê 2023年（71歲），有永遠ê性命歲月來大pān進入第七年。Tī chit七年內，主要ê靈修是khǹg tī消除永遠ê性命kah肉體ê無協調頂面，因為永遠ê性命siuⁿ大，肉體siuⁿ細，真oh互相適應，kakī to̍h一定ài想辦法去消除in體積之間差別siuⁿ過大ê互相牴觸感，hō͘雙方協調起來，chit種phah拚用去bē少時間。Iáu有因為tú開始m̄ tio̍h，掠準小肉體bētàng算是啥物物件，看它真無，終其尾hō͘身軀容易破病，mā一定tio̍h tī生活上想辦法來改正，加注意。Chit兩件事成做現在生活siōng重要ê工作，為tio̍h這付出bē少ê時間、精神kah體力。

因為kakī退休已經真久á，khah有閒ê時間；同時mā為tio̍h身軀ê健康。所以，最近koh重頭tńg來chìn前，開始作方言祈禱，chit pái koh khah用心，真chia̍p teh祈禱，mā koh khah phah拚教導新手講方言，就ánne發生koh khah chē ê神跡奇事。一直到今á日，我iáu tī靈命上kah大家奮鬥無歇睏，並無終止ê一工。這是我靈命成長ê第四段經驗，mā是《天路拾穗》chit本冊第四部「永遠ê性命」裡ê幾篇文章。

5. 書寫散文、詩歌、短篇小說

講tio̍h kakī ê基督教文學創作過程，差不多已經三十年ā。大部分lóng集中tī「稱義得救」kah「聖靈灌ak」chit兩个時期裡。文學類型主要ê是長篇小說，包括《血色蝙幅降臨ê城市》、《熱帶魔界》、《天上卷軸（上）》chit三本，以後to̍h m̄ bat koh再寫長篇ê基督教小說à。收集tī《天路拾穗》chit本冊ê散文、詩歌kah短篇小說thang講是最近所寫ê所有基督教ê文學創作，而且lóng是tī得tio̍h永遠ê性命了後所寫ê作品，chit時chūn ê作品看起來to̍h比較khah自由自在，無拘束，á ētàng有一種koh khah內在，koh khah要緊ê性命奧祕。我想讀者thang kā這兩階段ê文學創作做比較，to̍h ētàng看出內面ê轉變。

Chiahê to̍h是《天路拾穗》chit本冊第五、六、七部裡ê幾篇創作。

6.書寫神跡奇事

《天路拾穗》裡mā有書寫bē少ê神跡奇事，有kóa是邊á ê人看ē tio̍h ê，有kóa chiah是kakī chiah ētàng感受tio̍h ê，大部分lóng集中tī異象、異夢、方言祈禱kah醫治。這m̄是我本人á是朋友thiau故意ánne寫ê，因為所謂ê個人靈命成長乃是聖靈事工ê一部分，tī背後有聖靈ê推動，內面深深牽涉tio̍h聖靈對某人ê計畫kah作為，當咱kā chiahê聖靈ê事工thián開來，he to̍h是一件koh一件ê神跡奇事loh。

我個人主觀ê見解是：基督教ê發展基本上m̄是tī thūn地基ê傳道者鑽石嘴頂面，卻是tī神跡頂面。假使耶穌無行出hiahni̍h chē 神跡，ánne一定無大量ê群眾跟tòe tī祂ê後面，宣教to̍h真oh成功。講tio̍h彼得kah保羅初代教徒若欠缺來自tī聖靈hō͘ in ê神跡，宣教就ánne kantaⁿ ētàng無chhái工teh行tī沙漠頂面niāniā。咱ê靈命成長mā是ánne，he是聖靈m̄驚辛苦，一步koh一步tī信徒身軀頂，顯出神跡所帶來ê，內面充滿聖靈ê心思kah勞苦。假使有人講伊ê靈命完全是kakī chheⁿmê修練所得tio̍h ê，m̄是聖靈所帶來ê，ánne chitê人ê靈命成長to̍h欠缺根基，是bētàng信ê。

《天路拾穗》ê chiahê神跡，to̍h是書寫tī第一、二、三、四部裡，凡若chit四部裡所寫ê神跡lóng是確實可靠ê，是一種見證；有kóa神跡kiámchhái書寫kah無夠詳細，m̄koh lóng是真實無m̄ tio̍h，阮是帶誠意teh書寫chiahê神跡。

退一步來講，雖然《天路拾穗》裡ê我個人á是朋友寫bē少ê神跡，m̄koh nā是beh kah目前全球發生過ê基督教神跡á是聖經頂面所記載ê ná山ná海ê神跡比起來，阮mā bētàng算是啥物，chiahê細細ê神跡kantaⁿ ētàng引起內行ê人笑一下niâ！

7.是拾穗á是非拾穗ê問題

我想chit本冊ê出版，一定ē引起一kóa人ê疑問。

Tāi先一定有人ē問講：一个優秀ê基督徒ê靈命過程是m̄是一定tio̍h按照冊內面所敘述ê chit四个階段ê順序向前進展？Á是問講：Kám講一个優秀ê基督徒lóng一定tio̍h有chit四个靈命經驗？對chiahê問題，我個人ê回答是：我無認為優秀ê基督徒lóng一定tio̍h按照冊裡所講ê順序行完chit四个階段；mā無認為in lóng tio̍h有chit四个階段ê靈命經驗。我認為tī chit方面，每人lóng是自由ê，你ētàng照順序chit種行，mā ētàng無按照順序ánne行；你ētàng有內面ê一種靈命經驗，mā ētàng有兩个á是三个á是四个靈命經驗，這lóng是bē有問題。Chit本冊其實是擴大靈命ê版圖，hō͘讀者有一个真闊ê靈命眼界，了後koh來審視kakī ê靈修種類á是進程，hō͘ kakī認為有靈命缺陷ê人ētàng補正；講tio̍h對缺陷感覺無所謂ê人，除了「稱義得救」chit項我堅持任何基督徒lóng應該有以外，其他ê我無堅持。

Koh再其次是chit本冊名ê問題。Tī chia用「拾穗」chit兩字，to̍h表示chit本冊ê內容無lóng是hō͘大家注意tio̍h ê，m̄thang講是hō͘廣大基督徒所放sak。雖然kiámchhái tī「稱義得救」kah「聖靈灌ak」ê比較上是熱門ê話題，mā有真chē ê冊teh書寫chit兩方面ê經驗；m̄koh tī「聖靈內住」kah「永遠ê性命」chit兩項頂面to̍h khah無人談論，市面除了有一、兩本以外，to̍h真罕得看tio̍h；特別是根本無人願意透露chit兩種靈命ê私密經驗，hō͘咱無法度知影in ê內涵；tī歲月ê沉底，終其尾講tio̍h chit兩項靈命ê體驗，差不多hō͘人完全bē記得。雖然〈約翰福音〉三章裡有講：「上主疼世間人，甚至kā祂ê獨生kiáⁿ賜hō͘ in，叫一切信祂ê，bē致使滅亡，反得永生。」M̄koh基督徒差不多lóng對得tio̍h永遠ê性命無有gōa chē興趣，koh khah免講是談論伊本人ê靈命私密體驗。

所以chit本冊iáu是用「拾穗」來號名，表示無人ài談ê物件，本冊ê作者khioh起來談論。M̄koh，當你看了chit本冊，mā開始談論「聖靈內住」kah「永遠ê性命」ê時，等到人數koh再增加一kóa，ánne談論chit兩个題目to̍h m̄是「拾穗」loh，he to̍h是挖掘金山á是銀山loh，因為chit兩个靈命ê經驗是基督教siōng深奧koh siōng深入ê靈命經驗。

──2023、07、04寫tī鹿港