《宋澤萊新著《天路拾穗》台譯版》

 | | | 轉寄

第二部：聖靈灌AK_主題10：你mā ētàng教人講方言（靈語）_4

作者 宋澤萊 2026.03.29




第二部 聖靈灌ak


主題10：你mā ētàng教人講方言（靈語）！_4


4）方言ê平常性、實用性kah操練

我對方言ê接觸，到chitmá為止，已經超過30年以上ê時間，所接觸ê ētàng講方言ê人非常chē，無論生手mā好，高手mā好，我lóng認bat過。M̄koh並無tú tio̍h講方言ê人有所謂「起魔公（華語ê「走火入魔」）」ê現象；顛倒是我tú tio̍h ē曉講方言ê基督徒lóng是非常積極樂觀，in因為知影聖靈ê一kóa道理，變kah非常平和koh有自信，in因為ánne bē陷落去「因行為稱義」ê偏差內底，ētàng遵行聖靈ê教導來成就信仰，hō͘非常人尊敬。所以講方言妖魔化ê作為，在我看起來是無應該ê。In bē曉講方言m̄ to̍h好ah，soah mā bētàng容允別人講方言，甚至tiāⁿtiāⁿ嚴重褻瀆聖靈，將來一定ē食tio̍h羹。咱若是tú tio̍h chit種人，應該善意kā伊糾正，chiah免得伊一直m̄ tio̍h，終其尾致使無法度收soah。

同時，mā有人過分高舉講方言ê效果，認為講方言chiah ētàng「得救」，這又koh是一个極端ê看法。講方言kám ētàng得救？Chit點我無siáⁿ知影。M̄koh翻遍《聖經》絶對查bē tio̍h「講方言一定得救」chit句話，所以講了mā等於白講。《聖經》kantaⁿ有「因信稱義」、「信koh受洗一定得救」chiahê經文。「信耶穌」chiah是得救ê唯一法門，其他lóng是phòng風而已。所以tú tio̍h chit種無查考《聖經》講方言ê人，咱mā應該tio̍h kā伊勸導，hō͘伊tńg來「因信稱義」ê道路，hō͘伊有認bat「基要真理」ê機會，你免對伊siuⁿ客氣，chiah免得害tio̍h伊！

總講一句，講方言是真平常ê，kah咱ē曉講英語、日語是仝款，m̄nā bē oh學，mā無啥物希奇，用平常ê心態來看待to̍h好。

另外，講方言有兩个功用：一个是造就kakī；另外一个是造就教會。Tī造就kakī chit方面，乃是指ētàng giú近聖靈以及耶穌kah咱之間ê距離，hō͘聖靈kah耶穌密切tī咱ê心內生根；而且jú講方言，chit種感覺to̍h ē jú來jú深，這是真明顯ê效果，是bēsái否認ê事實。雖然保羅kā講方言ê恩賜列tī九種恩賜ê後面，hō͘人感覺它是「siōng細ê恩賜」，m̄koh tī實際ê體驗內底，它比「異夢」、「異象」koh khah ētàng giú近咱kah聖靈、耶穌之間ê距離。咱知影，ētàng做「異夢」「異象」ê人真容易to̍h變成「先知」，因為聖靈ē藉tio̍h「異夢」、「異象」tāi先kā伊講一kóa tāichì，看起來恩賜是真大ê；可惜ê是chit種人iáu是無法度「時時刻刻」有「異夢」、「異象」。因為咱除非睏去，若無，bē有「異夢」；mā無可能ta̍k个tī當頭白日lóng有「異象」。M̄koh，咱卻ētàng「時時刻刻」講方言，也to̍h是「時時刻刻」hō͘ kakī深切感受tio̍h上主kah我同在，這是講方言無可取代ê優勢，所以你kám ētàng講它是siōng細ê恩賜？

同時，有能力tiāⁿtiāⁿ做「異夢」、「異象」甚至「聽tio̍h上主ê話語」ê人真少，無親像講方言ê人hiahni̍h普遍，to̍h koh khah hō͘人感覺它是chiâⁿ重要。講方言chiah是聖靈kah眾信徒之間siōng好ê溝通管道，一旦放棄講方言，to̍h等於是截斷聖靈kah信徒之間siōng好ê往來橋樑，chit點值得反對講方言ê人好好á斟酌思考！

當然，我m̄是講凡若ē曉講方言ê人，一定ētàng kah聖靈進行siōng深刻ê交流，有ê人雖然ē曉講方言，m̄koh對聖靈ê體驗iáu是無法度深入，這to̍h ài看講方言ê人kám願意phah拚「操練方言」（也to̍h是tiāⁿtiāⁿ講方言）來決定。

一般來講，kantaⁿ ē曉講幾个音節方言ê人kah ētàng長篇大論說方言ê人是無仝款。前者ê功力淺，後者ê功力深，這是一定ê道理。M̄koh，靠「操練」（也to̍h是tiāⁿtiāⁿ講方言），到siōng尾只有講幾个音節ê人mā thang變成ētàng講kah躼躼長ê人，hō͘之間ê差別hông giú平。驚ê to̍h是，有kóa已經學ē曉講方言ê人無koh講方言，致使10年、20年了後，伊照常kantaⁿ ē曉hit幾个音節ê方言，這to̍h真可惜loh！