《《平民ê基督傳》》

 | | | 轉寄

TĒ6 KoànTĒ12 chiuⁿ KOH TŃGKHÌ CHIŪKŪN PĒ第六卷第十二章 Koh Tńg去就近父

作者 Tâi e̍k:Ko Tekchiong,Siutēng Lîm Chùnio̍k & Chng Hūiphêng 2025.02.23





TĒ12 chiuⁿ KOH TŃGKHÌ CHIŪKŪN PĒ

Chóngsī hit ê khoàilo̍k, kîīⁿ, thang chhiⁿkiaⁿ ê kaupôe sī bē thang kútn̂g. Hit ê éngoán ê Kiáⁿ ū tùi Bia̍tléhèm ê bétiâu chhuthoat lâi hóngbūn chit sèkan, taⁿ sī tehbeh soah lah. Tútú sī chhinchhiūⁿ I só͘ kántan kóng· ê. "Góa tùi Pē chhut·lâi, ia̍h ji̍p sèkan, koh līkhui sèkan lâi kui tī Pē."

Chūjiân sī ánni. Lán sī bēthang siūⁿchhut símmi̍h pa̍tkhoán ê chiongkio̍k. Chhìsiūⁿ, siatsú chit ê útiū ê Chú iáu oa̍h tī chit ê siósió ê tēbīnchiūⁿ bó͘ chi̍t só͘chāi, phìjū lâi kóng, chittia̍p I iáu oa̍h tī Êlúsalém, ásī Lûntun siâⁿ, Palí siâⁿ, ásī Lômá siâⁿ, ē ànchóaⁿ? Nāsī ánni I chíū ē thang tiàm tī I hitsî só͘ khiākhí ê só͘chāi nātiāⁿ, iā pa̍t só͘chāi I chiū bē thang tī·leh. Lán nā kanta ánni siūⁿ māsī íkeng ū kànglo̍h I ê chukeh, iā sī bô ha̍plí ê sū.

Chóngsī I ê jio̍kthé tio̍h ài līkhui khì, bô kap lán saⁿkap tiàm, tùi ánni I ê Sînlêng chiū tī ta̍k só͘chāi, ta̍k sîchūn thang kap I khólîn ê ha̍kseng saⁿ kiatliân, chiū putkoán símmi̍h sîchūn lán thang ji̍p tī lán ê ba̍tpâng lâi koaiⁿmn̂g, tīhia iā thang kap I saⁿkap khiākhí. "Góa khì sī chòe lín ê līek."

Lūn sengthian ê sū, chāilâi éngéng ū lâng ài phāu hithō tansûn iùtī ê kiànkái, chiūsī kóng, I ê jio̍kthé ū līkhui chit sèkan, tùi khongtiong ti̍tti̍t chiūⁿ·khì, āulâi chìnji̍p tī bûchèhān ê khongkan kàu tī hit ê éngoán ê Thiantông ê chōūi. Che sī iùtī ê kiànkái. Siatsú nāsī chiàu só͘ kìchài ánni lâi kóng, lán chiū bē biántit ài thêkhí chit ê iùtī ê būntôe. Ánni Thiantông sī chíbêng chi̍t ê tiāⁿtio̍h ê só͘chāi, ásī chi̍t ê sengoa̍h ê chōngthài ? Thiantông kám sī chíbêng chi̍t ê tiāⁿtio̍h honghiòng ê bó͘ só͘chāi ? Kîsi̍t tī chit ê putsî teh ūnchoán ê tēkiû, lán kiám ē thang kóng ū téngbīn kap ēbīn ê hunpiat?

Chitkhoán iùtī ê susióng, khioksī ū gō͘kái ê só͘chāi, chóngsī ūitio̍h beh chhiánbêng sengthian ê tāiì, che mā bô bái kàu ànchóaⁿ. Che thang kóng sī sengthian ê kò͘sū só͘ beh piáuhiān ê chinlí, chit ê tansûn ê piáusiōng, chiūsī piáubêng lán ê Chú ū tiàm tī I sînlêng ê jio̍kthé lâi līkhui lán ji̍p tī hit ê bûhêng ê sèkài, koh tòtńgkhì I só͘ chhuthoat, iā pún sī tī·leh ê sèkài. Lán sìn lán só͘ kiòchòe sī Sengthian, chit ê iúbêng ê sūsi̍t, putkò sī piáubêng I ū chhinchhiat, khiampi, ài hō͘ lán tansûn ê susióng ē thang líkái I. Lūn hit ê khah kosiōng ê sèkài, chiūsī pôaⁿkè lán hiānchāi só͘ líkái ·ê ,lán khahsiông sī ài liânsióng tī téngbīn ū chēchē chhiⁿchhùi ê thiⁿ, iā tī hit ê chhiⁿchhùi ê thiⁿ ê téngbīn ū chēchē chhiⁿsîn koânkoân ê só͘chāi. Inūi I ū jiōngpō͘ lán tansûn ê simsu, só͘í I bô chhinchhiūⁿ pa̍t ê sîchūn, chū ánni hō͘ lán bô khòaⁿkìⁿ I. I ū līpia̍t tē·ni̍h ti̍tti̍t chiūⁿ·khì, iā ū hûn lâi gêngchiap I. Kîsi̍t hit ê ìsù putkò sī kóng I ū līkhui lán chit ê hiānchāi ê sèkài lâi ji̍p tī lán só͘ bē líkái ê pia̍t sèkài.

Chhinchhiūⁿ ánni, kàu tī chi̍t ji̍t I kap in chòeāu sionghōe liáu, chiū kap in éngoán saⁿ līpia̍t chiūⁿthiⁿ. chòeāu I ū kàsī in lūn Siōngtè kok ê sū. "Thiⁿténg, tēē ê koân íkeng lóngchóng hō͘ góa. Só͘í lín tio̍h khì phó͘ thiⁿē chio bān pehsìⁿ lâi chòe ha̍kseng, kā in kiâⁿsóelé, hō͘ in kui tī Pē, Kiáⁿ, Sèng Sîn ê miâ; kìⁿnā góa só͘ ū bēnglēng lín ·ê, tio̍h kàsī in siú; koh góa ji̍tji̍t kap lín tī·leh, kàu sèkan ê lō͘bóe."

Āulâi I ū chhōa in chhutkhì kàu Bia̍tsáitah lâi tīhia kap in chòeāu līpia̍t. I chiū gia̍h khí chhiú lâi kā in chiokhok. I teh chiokhok ê sî, chiū līpia̍t in, siū chihchiap chiūⁿthiⁿ.

Nachalia̍t ê Iésu ū chhinchhiūⁿ ánni lâi līkhui lán tńgkhì chiūkūn Pē.

Lán ê Kitoktoān sī kàuchia tn̄gchām. Kîsi̍t I ê lâile̍k sī bô soah bóe. Tútú sī chhinchhiūⁿ lán tī thâuchi̍t bīn só͘ kóng, I ê lâile̍k sī bô khíthâu, sī tio̍h tòtńg siūⁿ kàu tī hit ê Bô khòaⁿkìⁿ ê sèkài; chhinchhiūⁿ ánni, lán chai chittia̍p suisī bô oânchoân, māsī tio̍h tīchia lâi tn̄g chām· khì. Kîsi̍t I ê lâile̍k sī bô soah bóe, tio̍h ài koh sòachiap lâi siūⁿ tī chionglâi hit ê Bôkhòaⁿkìⁿ ê sèkài I só͘ chòe ê sūgia̍p.

Chit ê Hokimsu putkò sī Iésu ê jînkeh kap I ūitio̍h jînlūi só͘ chòe ê sūgia̍p ê le̍ksú tiong saⁿcha̍psaⁿ nî kú chi̍t chām ê le̍ksú nātiāⁿ. Lūn chit ê Kitoktoān chêng ê sū sī ū kìchài tī hit ê éngoán ê kìlio̍k, iā lūn chit ê Kitoktoān āu ê sū, sī ū kìchài tī hit pêng ê sèkài ê kìlio̍k. "Tī thiⁿ·ni̍h ū chheh hian khuikhui" hitsî lán thang siūⁿ tīhia choân jînlūi ū teh tha̍k i. Sī lah, tī hit pêng ê sèkài lán ū khòaⁿkìⁿ jînlūi ū koh teh siá i, chiūsī tī tēbīnchiūⁿ hiah ê úijîn, chhinchhiūⁿ susiúⁿka, ōetô͘ka, íki̍p sijîn, lóng ū tī bīlâi ê sèkài koh sòachiap in ê kang teh siá I ê lâile̍k.

Chhinchhiūⁿ ánni, lūn Iésu ê sengoa̍h, lán sī tio̍h koh sòachiap lâi kóngkhí I tī hit pêng ūitio̍h lán jînlūi só͘ chòe ê sūgia̍p, iā hit ê sūgia̍p sī beh sòachiap kàu éngoán thang oânsêng i, iā kàu hitsî sísit kap tēge̍k, Pháiⁿ kap hit ê pháiⁿ· ê lóng beh tútio̍h khìsak tī Bia̍tbô ê chhimian, iā hitsî tùi chit ê Siōngtè ê útiū beh éngoán hòebô Pháiⁿ ê khùila̍t, iā Siōngtè beh chòe bānū ê Chúcháiⁿ, tiàm tī Bānū tiong.

Chit ê siū Sîn kámtōng ê Iôhaneh ū kóng, "hitsî chiah sī bānū ê kiatkio̍k." Hitsî kiámchhái hiah ê úitāi ê lâng beh tī thiⁿni̍h ê tô͘sukoán lâi siá kóng, taⁿ Kitok ūitio̍h jînlūi só͘ chòe ê sūgia̍p sī chhengchhó lah.

Sengthian ê kò͘sū, putkò sī I chiâⁿchòe chi̍t ê sèkan lâng tiàm sèkan saⁿcha̍psaⁿ nî, chit chi̍tkhoán ê le̍ksú ê kiatkio̍k nātiāⁿ.

Chiàu lán lâng só͘ teh sǹg chit ê sîkan ê hoattō͘ lâi kóng, chiūsī tī saⁿcha̍psaⁿ nî chêng, tùi téngbīn hit ê chhinchhiat ê sèkài ū chi̍t ê Eⁿá chhutsì lâi ji̍p tī lán chit sèkan, ūitio̍h lán jînlūi lâi oa̍h, lâi sí. Iā chèng Thiankun tī Kiùchú Sèngtān ê àmmî ū chhut in ê kaukài, ēng chongpài, tôngchêng ê sim lâi chhengchàn Siōngtè ê hiseng. "Tī ke̍k koân ê ūi,êngkng kui tī Siōngtè. Tēchiūⁿ hôpêng tī I só͘ hoaⁿhí ê lâng ê tiongkan!" TĪ saⁿcha̍psaⁿ nî ê tiongkan, in ū ēng kîkoài kap kankhó͘ ê sim lâi khòaⁿ lán sèkan lâng, tùi in ê Chú só͘ hiánchhut ê thàitō͘.

Chittia̍p lán tio̍h ài soah chit chi̍tchām ê kò͘sū. I ū chiong lán khólîn ê jînlūi ê sū, éngoán khektiâu tī simni̍h lâi teksèng, koh tńgkhì chē tī chit ê útiū ê chōūi, Pē Siōngtè, chèng Thiankun, íki̍p tī Sèngtān mî teh gîmsi ê Sèngsài ê bīnchêng.

Sûn Siáⁿmn̂g ah! Lín tio̍h kia̍h koân, éngoán ê mn̂g ah! lín tio̍h kiah koân, êngkng ê Kunông beh ji̍p. Chit ê êngkng ê Kunông sī siáng? Bānkun ê Iâhôhoa chiūsī êngkng ê Kunông.
(Oân)
( 2.20.2004 Tân Chhengchùn tiúⁿló phahjī)



第十二章 Koh Tńg去就近父

總是hit-ê快樂、奇異、thang生驚ê交陪，是bē-tàng久長。Hit-ê永遠ê kiáⁿ有tùi伯利恆 ê馬寮出發，來訪問 chit世間，taⁿ是teh-beh soah lah。Tú-tú是親像伊所簡單講-·ê，「我tùi父出來，亦入世間，koh離開世間來歸tī父。」

自然是án-ne，咱是bē-tàng想出啥物別款ê 終局。試想，設使chit-ê宇宙ê主猶 活 tī chit-ê小小ê 地面上某一所在。譬喻來講，chit時伊猶活 tī耶路撒冷，á是倫敦城，巴黎城，á是羅馬城，ē án怎？若是án-ne，伊只有ē-thang tiàm tī伊hit時所khiā起ê所在niā-niā，也別所在伊to̍h bē-tàng tī-·leh。咱若kan-taⁿán-ne想，mā是已經有降落伊ê資格，也是無合理ê事。

總是伊ê肉體 tio̍h ài離開去，無kah咱做伙 tiàm，tùi án-ne，伊ê 神靈to̍h tī ta̍k所在，ta̍k時chūn thang kah伊可憐 ê學生相結連，to̍h不管啥物時chūn，咱thang入tī咱ê密房來關門，tī-hia也thang kah伊做伙 khiā起。「我去是做lín ê 利益。」

論升天ê事，在來tiāⁿ-tiāⁿ有人ài 抱 hit款單純幼稚 ê 見解，to̍h是講，伊ê肉體有離開chit世間，tùi空中直直上去，後來進入tī無制限 ê 空間，到tī hit-ê永遠ê 天堂 ê 座位。這是幼稚ê 見解。設使若是照所記載án-ne來講，咱to̍h bē 免得ài提起chit-ê幼稚ê問題。Án-ne 天堂是指明一个tiāⁿ-tio̍h ê所在，á是一个生活ê 狀態 ?天堂是指明一个tiāⁿ-tio̍h 方向 ê某所在?其實tī chit-ê不時teh運轉ê地球，咱kám ē-thang講有頂面 kah下面 ê 分別?

Chit款幼稚ê思想，卻是有誤解ê所在，總是為tio̍h beh詳細說明升天ê大意，這mā無bái到án怎。這thang講是升天ê故事所beh表現 ê真理，chit-ê 單純 ê表象，to̍h是表明咱ê主有tiàm tī伊神靈 ê肉體，來離開咱入tī hit-ê無形ê世界，koh tò-tńg去伊所出發，也本所tī--leh ê世界。咱信咱所叫做是升天，chit-ê有明 ê事實，不過是表明伊有親切、謙卑，ài hō͘咱單純 ê思想 ē-thang理解伊。論hit-ê khah 高尚 ê世界，to̍h是pôaⁿ過咱現在所理解-· ê，咱khah常是ài聯想 tī 頂面有chē-chē青翠ê天，也tī hit-ê青翠ê天ê 頂面有chē-chē星辰高高 ê所在。因為伊有讓步咱單純 ê心思，所以伊無親像別ê時chūn，自án-ne hō͘咱無看見伊。伊有離別地裡直直chiūⁿ--去，也有雲來迎接伊。其實hit-ê意思不過是講伊有離開咱chit-ê現在ê世界來入tī咱所bē理解ê別世界。

親像án-ne，到tī一日，伊kah in最後相會了，to̍h kah in永遠相離別上天。最後伊有教示in論上帝國ê事。「天頂、地下ê權，已經lóng總 hō͘我。所以lín tio̍h去普天下招萬人民來做學生，kā in行洗禮，hō͘ in 歸tī父、Kiáⁿ、聖神 ê 名；今若我所有命令lín-· ê，tio̍h教示in 守；koh我日日kah lín tī-·leh，到世間ê路尾。」

後來伊有chhōa in出去到伯大尼，來tī-hia kah in最後離別。伊to̍h gia̍h起手來kā in 祝福。伊teh 祝福ê時，to̍h離別 in，受chih接上天。

拿撒勒 ê耶穌有親像án-ne，來離開咱tńg去就近父。

咱ê基督傳是到chia斷chām，其實伊ê來歷是無soah尾。Tú-tú是親像咱tī 頭一面所講，伊ê來歷是無起頭，是tio̍h tò-tńg想到tī hit-ê無看見ê世界；親像án-ne，咱知chit時雖是無完全，mā是tio̍h tī-chia來斷chām去。其實伊ê來歷是無soah尾，tio̍h ài koh續接來想tī將來hit-ê無看見ê世界伊所做ê事業。

Chit-ê福音書不過是，耶穌ê人格kah伊為tio̍h人類所做ê事業ê歷史中，三十三年久一chām ê歷史niā-niā。論chit-ê基督傳，前 ê事是有記載tī hit-ê永遠ê記錄，也論chit-ê基督傳後ê事，是有記載tī hit-pêng ê世界ê記錄。「Τī天-·裡有冊掀開開」，hit時咱thang想tī-hia，全人類有teh讀伊。是lah，tī hit-pêng ê世界，咱有看見人類有koh teh寫伊，to̍h是tī 地面上hiah-ê偉人，親像思想家、畫圖家，以及詩人，lóng有tī未來ê世界koh續接in ê工，teh寫伊ê來歷。

親像án-ne，論耶穌ê生活，咱是tio̍h koh續接來講起伊tī hit-pêng為tio̍h咱人類所做ê事業，也hit-ê事業是beh續接到永遠thang完成伊，也到hit時，死失kah 地獄，pháiⁿ kah hit-ê pháiⁿ-· ê lóng beh tú-tio̍h棄sak tī滅無ê 深淵，也hit時tùi chit-ê上帝ê宇宙， beh永遠廢無pháiⁿ ê氣力，也上帝beh做萬有ê主宰，tiàm tī萬有中。

Chit-ê受神感動ê約翰有講：「hit時chiah是萬有ê 結局。」Hit時hoān-sè hiah-ê偉大ê人beh tī天裡ê圖書館來寫講，taⁿ基督為tio̍h人類所做ê事業是清楚lah。

升天ê故事，不過是伊成做一个世間人，tiàm世間三十三年，chit一款ê歷史ê 結局niā-niā。

照咱人所teh 算 chit-ê時間ê法度來講，to̍h是tī三十三年前，tùi 頂面 hit-ê 親切 ê世界有一个嬰á出世，來入tī咱chit世間，為tio̍h咱人類來活、來死。也眾天軍tī 救主聖誕 ê暗暝有出in ê交界，用崇拜、同情ê心來稱讚上帝ê 犧牲。「Τī極高 ê位，榮光歸tī上帝。地上和平tī伊所歡喜ê人ê中間！」

Tī三十三年ê中間，in有用奇怪kah艱苦ê心，來看咱世間人對in ê主所顯出ê態度。

Chit時咱tio̍h ài soah chit一chām ê故事。伊有kā咱可憐 ê人類 ê事，永遠刻tiâu tī心裡來得勝，koh tńg去坐tī chit-ê宇宙ê 座位，父上帝、眾天軍，以及tī聖誕暝 teh吟詩ê聖使ê面前。

旬城門ah!Lín tio̍h kia̍h高，永遠ê 門ah!Lín tio̍h kia̍h高，榮光 ê 君王beh入。Chit-ê榮光 ê 君王是啥人？萬君ê耶和華to̍h是榮光 ê 君王。
(完)
3.5.2004 林俊育翻寫漢羅完成 5.9.2004 陳清俊kah林俊育共同校對