《Kah陳小小做伙讀台語》

 | | | 轉寄

享受工作，Tāichì就ánne完成

作者 陳小小，台譯：Lîm ChùnIo̍k 2024.11.17




享受工作，tāichì就ánne完成

陳鳳翔

Ta̍k冬過年，全台灣lóng ē時行一件tāichì：排隊買樂透。Teh幻想一年ê開始，tio̍h 億來億去 ê彩金；teh計畫the̍h tio̍h錢ê第一時間to̍h辭掉工作，免koh再看tio̍h頂司頭家指揮ê目色，也免kui工防備白蓮花同伴ê設計。買豪宅、買名車、環遊全世界，錢ài án怎用to̍h án怎用。背後有一个共同ê想法，he to̍h是ta̍k工lánsi做戇人，免工作siōng快樂。

M̄ koh，工作卻是上主ê本質之一！創世記1:1，上主一出場to̍h是工作，「起初，上主創造天地。」祂享受工作，而且欣賞工作ê成果。創世記第一章記載上主工作ê過程，不斷重複出現兩个短語「tāichì就ánne完成」、「上主看做是好ê」。上主工作到一个段落「tāichì就ánne完成」，續接祂欣賞工作ê成果，「上主看做是好ê」。上主讚嘆kakī ná ē做kah hiahni̍h美好！

創世記1:6-10記載上主感覺各種水之間應該tio̍h有穹蒼，kā水分做頂下。祂to̍h造出穹蒼，kā各種水分做頂下，「tāichì就ánne完成」。又koh kā水聚集tī一个所在，hō͘乾地露出來，「tāichì就ánne完成」。Hit日ê工作來到一个段落，「上主看做是好ê」。祂欣賞kakī所做ê一切。

創世記1:14-19記載上主認為天頂ài有光體來分暝日，kā in做記號，定季節、日子、年份，in ài tī天空發光，照tī地上。祂to̍h造兩个大光體，又koh造星辰，「tāichì就ánne完成」。Hit日工作來到一个段落，「上主看做是好ê」。祂欣賞kakī所做ê一切。

上主創造ê巔峰之作是人類：「阮beh照着阮ê形像，按照阮ê樣式造人，hō͘ in管理海裡ê魚、天裡ê鳥、地chiūⁿ ê chengseⁿ kah全地，以及地chiūⁿteh爬ê動物。」（創世記1:26）

人類是照上主ê形像所造，「形像」צֶלֶם chit字也用來指君王塑像ê建立。Thang講人類是上主tī受造世界ê代表，kah祂同工或代替祂做伙管理chitê地。創世記hō͘我驚嘆，上主ná ē hiahni̍h kah意工作！因為工作kah歇睏ê比例是六比一，工作六工，歇睏一工。若換做我做上主，保證是工作一工，歇睏六工。

創世之初ê亞當和夏娃應該kah上主仝款，在工作中得tio̍h真chē快樂，並欣賞著kakī手所做ê，「tāichì就ánne完成」、「看做是好ê」。M̄ koh in選擇吃善惡知識樹ê果chí，也to̍h是選擇kakī決定啥物是善、啥物是惡。上主看做是好ê，無一定好，kakī看做是好ê，就是好ê。In吃hitê果chí了，並無增加啥物智慧，要編樹葉遮蓋（jiakhàm）身軀，選材質極bái ê無花果樹葉á，m̄ bat得選結實爽快一點ê葉á。In吃hitê果chí了，呈現ê是kakī作上主，kakī lóng tio̍h，別人lóng m̄ tio̍h！亞當感覺kakī tio̍h，夏娃m̄ tio̍h；夏娃感覺kakī tio̍h，蛇m̄ tio̍h。阮/咱chiahê亞當êkiáⁿ孫，各人按kakī眼中看做是對ê去行。這人看tio̍h這樣行是好ê，hit人看tio̍h這樣行是壞ê，誰也不服誰，人與人互相傷害。甚至，人人皆看做是是好ê，卻帶來全球毀滅性ê災害，其他受造物看tio̍h是惡ê、壞ê，上主也看tio̍h是惡ê、壞ê。

吃了善惡知識樹ê果chí，人類ê眼光與判斷能力被罪扭曲，看做是好ê，soahtiāⁿtiāⁿ不是好ê，顛倒是惡ê。士師記中「各人任意而行」ê短句（士師記17:6；21:25），原文是「各人按他眼中看做是對ê去行」（אִישׁ הַיָּשָׁר בְּעֵינָיו יַעֲשֶׂה׃），整個士師時代sio殺、捉搶、強暴等人間地獄ê畫面，越演越烈。亞當和夏娃原本親像上主享受tio̍h「tāichì就ánne完成」、「看做是好ê」ê快樂，但in犯罪，地因為ánne，soah受咒詛，人人無koh從工作過程中感受tio̍h快樂，大部份是注目tī過程中ê倦tahtah（創世記3:17）。

未信主chìn前，我thang tùi工作與課業中感受快樂，m̄koh khah chē時chūn感受tio̍h ê是工作帶來ê壓力kah倦tahtah。Kah大多數人仝款，我ǹg望kakī是一个樂透ê好字運kiáⁿ，永遠無需要工作。M̄ koh，文字工作ê呼召臨到我，定落來ê計畫ta̍k禮拜至少ài寫一兩篇文章。我teh想可能ē虎頭鳥鼠尾，無想tio̍h，上主賞賜猛猛ê文字魂，提升我ê思考厚度，擴展我ê視角，抽象ê概念一一轉做具體有層次ê結構。我領受聖靈保惠師賞賜ê靈感，teh奇怪文字m̄照原定ê意念鋪排，kiâⁿ向另外一个新意，「tāichì就ánne完成」。交稿前，我tiāⁿtiāⁿ讀tú出爐ê文章，頌讚感謝上主，同時欣賞chiahê超過kakī原本能力ê文章，「看做是好ê」。

「Tāichì就ánne完成」、「看做是好ê」，tùi寫作延展到日常生活繁雜無趣味ê家事中。掃地、lù土kha了後，「tāichì就ánne完成」，我「看做是好ê」，thǹg赤腳爽快行tī光潔ê地板頂。洗pha̍k衫褲了後，「tāichì就ánne完成」，我「看做是好ê」，幸福穿有日頭光氣味ê衫褲。了一回好功夫做ê幾chhut家常料理，「tāichì就ánne完成」，帶hō͘全家人溫暖ê共餐回憶，「看做是好ê」，疼ê連結維繫無停。照常是無斷chām ê循環—掃地、lù土kha、洗pha̍k衫褲、處理三頓，m̄koh我ê心態無koh是原來ê厭倦kah棄嫌。對khangkhòe場ê工作，自然也無koh是只有領tio̍h薪水ê hit刻chiah歡喜。

大多數ê人用為耶穌來，to̍h只是hō͘信徒死了後chiūⁿ天堂。事實上，耶穌帶來ê新性命，tùi信主ê hit一刻已經開始。祂矯chhiâu正人短淺koh扭曲ê眼光以及判斷能力，幫助信祂ê人體會tio̍h、經驗tio̍h上主看做是好ê，是真正好！我無koh買樂透，也chhàutúkhám tiòng樂透，我iáu tiāⁿtiāⁿ做義工，無任何薪水，因為kah祂同工是何等ê享受！

耶和華是享受工作ê上主，欣賞工作成果ê上主。受造ê我tī工作中反映祂ê形像kah樣式，tī工作中kā榮光歸tī祂ê創造大工程，實際經歷tio̍h創世之初「tāichì就ánne完成」、「看做是好ê」ê美好。