《台文通訊精選》

| | | 轉寄

暗時ê後窗

阿草伯每一擺若講著伊ê阿良,伊就掠狂;m̄是因為伊賣二分祖公á留落來ê財產hō͘伊讀大學,畢業了後koh賣二分地hō͘伊去讀碩士、博士leh m̄甘。伊是leh氣in kiáⁿ kā伊講,tī台灣做助教、講師升到教授ài真久,不如hō͘伊去外國the̍h博士,轉來就升副教授,會khah緊出頭天。

Ná會知影得著統計學博士以後,觀念總改變。伊講美國教授kā伊講,有一個大型研究計劃需要伊留落來。伊講tī NASA太空總署內底,teh研究人造衛星飛行路線不斷修正,飛行中真chē可能kap無可能發生ê代誌。雖然che m̄是真深、真新ê研究問題,但是需要真chē新人去發現新科技、新ê飛行工具種種ê新問題,ná知影koh過十外年。阿草伯腳khǹg tī長椅條(liâu),嘴連幹kiāu,伊講飼kiáⁿ m̄知影有啥物路用,伊總是食台灣水kap台灣米大漢ê,食果子mā ài拜樹頭,伊轉來台灣做乞食,mā khah贏tī美國teh好額。

Tī半年前,阿良有拍電話轉來,伊講beh退休轉來tòa台灣故鄉,這擺m̄知有影無,...。阿良有講伊chit-má是地球村ê一份子,伊是世界公民,科技是無國界,講真chē大道理...阿草伯a愈想愈氣,阿良根本就是芎蕉(黃皮膚,白人思想) 。阿草伯真感慨leh講:「你看,tī大熊星座kap小熊星座下腳,hit粒北斗星,咱看會著,上蓋光,koh永遠kā出外人kap行船人指示北方ê方向。」

這時我注意著閃tī 阿草伯目睭ê光線,m̄知是遠遠星光ê反射抑是伊ê目屎。伊oan-na講,oan-na繼續看遠遠暗暝ê星:「阿良就親像一扇台灣ê後窗,講重要伊m̄是足重要,m̄-koh伊會使供給台灣通風kap光線。但是,我期待伊是一個奉獻者,ná親像一個大門。對一間孤魂厝來講,門ê貢獻khah chē,親像恁tòa tī台灣teh拍拚ê人攏是一扇一扇ê門,阿良會使算是暗時ê後窗niā-niā。」

阿草伯冊讀無chē,我聽kah花花。阿草姆a坐tī邊a teh泡茶hō͘阮lim,倒手the̍h正手ê衫á邊teh拭目屎。

我mā leh想,阿良為著beh khah緊踏入太空ê領域,伊chhōe著khah新khah大隻、行khah緊ê船,但是伊敢會記得,阿草伯、阿草姆提供ê旅費,kap hia ê kā伊歡送ê台灣人,m̄知伊敢bat眠夢著福爾摩沙--抑是美麗島從來m̄-bat入伊ê夢?