《賴永祥講書》

| | || 轉寄

《教會史話》(1_072)盲人信徒溫旺被thâi

甘為霖牧師寫「台灣佈教之成功」chit本冊,mā公開了另外一ê kap吳志高有關ê事件,就是溫旺被thâi。詳情請讀該書412~420頁kap 517~519頁。

溫旺(Un Ong)吉貝耍人,早年因為一寡小代誌kap吳志高ê黨徒有衝突,所以有一暗tī路nih被襲擊soah來受傷,最慘ê人就是兩lúi目睭去hông挖--去。後來伊聽道得救,無koh再怨恨伊ê敵人,甚至親身到吳志高hia見證主愛。或者吳志高是為beh收買伊,所以表示願意提供金錢,mā愛伊參與tī店仔口(白河)ê生意。m̄-koh伊以「主ê徒無應該kap非信徙合股作生意」為理由,來拒絕--伊。

事件發生ê前年(1876)夏天,有一ê小事件.吉貝耍信徒ê牛,hō͘一群黨徒掠去,chhōa領這一群;人ê章興(Chiong-hin)ti7leh趕hit隻牛ê時被信徒認出--來,soah告到地方官衙,m̄-koh代誌著按呢無結果a。章興恨信徒去kā tâu,就嗆聲beh報仇,伊ê目標是溫旺,因為溫旺為信徒同僚要求公道尚有力。

1877年4月14日,溫旺去店仔口beh領一筆錢,in子溫木(Un Bok,11歲)kap吉貝耍教會肯年向茂春(Hiong Baw-chhun)偕行。一行tī回程ê時,到了牛稠埔頭,tú著7、8 ê匪徒由章興chhōa領,匪徒就giâ刀斬茂春到伊失去知覺,後 溫木ê頭kap肩胛頭,最後兇殺溫旺致死。茂春後來恢復知覺想beh逃走,被兇惡有名後山頭出身ê名土(Thuh)者發覺,一直追到許秀才ê大厝門前,好加在民眾出來解救,chiah被送交hō͘番社官衙法辦。

隔tńg工有2位信徒趕去嘉義縣beh稟告,到底是庄腳人,無法託人備辨官方要求ê冊面,不會o͘-se,也就無任何結果。番仔田總爺陳朱英(Tan Chu-eng)bat去吉貝要耍作過調查。由他知影被掠ê土在番社監獄3日就逃走,tī路中因為搶了一ê苦力ê衣服被hit ê苦力追到屬於吳志高ê糖舖(a large sugar-store) 官員要求吳志高交出人,m̄ koh去hông拒絕。章興無去hông掠去,返吉貝耍仍頗得意而不隱蔽伊所做ê代誌。6日了後信徒tī遠離兇殺現場數哩外找到溫旺ê屍體,頭蓋受著kòng傷,歸身軀攏有傷痕,身上有6箍。

如此,有白水溪之遭難、有溫旺之遭殺,有其他真多對信徒ê侮辱kap迫害,再加上吉貝要禮拜堂被燒毀(1877年12月11日)等事件常常傳出,甘牧師只好央求英領事Frater ê協助,堅決要求官方愛好好仔處理chit件代誌。最後嘉義縣重開公審,判所有兇手就範,總爺被降級處分,吉貝要禮拜堂愛賠償新建,有新ê告示嚴飭保護教會。

《台灣教會公報》 1952期 主後1989年7月30日