《賴永祥講書》

| | | 轉寄

《教會史話》(2_134) 二老口舊樓

1868年11月25,馬雅各醫生ùi打狗出海路去安平,經kòe 2禮拜走chhōe後,tī府成內二老口chhōe tio̍h一間大厝,做傳教ê基地;chit間厝一直hō͘教士會使用kàu 1900年chiah hâiⁿ hō͘厝主。Tī後來óa東門起ē新樓,一般叫chit間厝是舊樓。

Chit間大厝tī二老口街府東pêng ê巷á尾,西pêng óa後來ê英國領事館,koh隔壁tio̍h是台灣府署。厝是舊型ê kē厝á,有三進。第一進做醫館、藥房、外科房、病房,第二進有禮拜堂,後進有ē-kha手人ê房間、客房、倉庫等等。Ùi自正門入..來ê正pêng有2間房間,是馬醫生翁á某ê khiā-ke,馬醫生轉去liáu後換甘為霖牧師tòa。Tò-pêng有2間房間,siōng頭起先是吳文水、高長tòa,後來由接替馬醫生ê德馬太醫生(Dr. Matthew Dick-son,1871年來台)tòa。城內有大青á、檳榔樹á kha有柚á-châng,有花園,有一口深井(ē-sái提供品質真hó͘ ê水)。

根據馬醫生tī 1902年hō͘巴克禮ê批,知影chit間厝ùi「金繼成」(Kim Ke-seng),tio̍h是?生許建勳(素為英商怡記行夥)設ê行。一般lóng叫做「許厝」。Chit間厝後來是許廷光tòa..ē。許廷光,1861年生,號凌槎;祖宜章,號純德,秀才;父朝華,字遜榮,號茂堂,恩貢生,候補同知;嗣父慶清,恩貢生,候補知縣;廷光tī三世文學之家ê所在出世,真少年tio̍h真khiáu。光緒癸未1883年)科秀才,乙酉(1885年)科增生,癸已(1887年)科補廩生。乙未(1895年)日本軍人來台灣,伊kap蔡夢熊、楊鵬搏、陳修五等代表市民,偕巴克禮宋忠堅去見日本將軍乃木希典,請伊入..來。Tī日本人ê統治下,做台灣總督府評議會員等ê要職,權力kap錢財lóng有,m̄-koh老..來真落魄。產業落tī日本營造廠「湯川組」(組頭湯川鹿造)。根據黃茂卿tī台南市政事務所查ē(見太平境……教會設教九十年史)(565-567頁),hit-ê地號是台南市壽段一小段六番地,面積lóng總是四分九區七毛(約1400坪),是chit-má省立台南啟聰學校博愛堂kap隔壁sio接ê宿舍(衛民街26、28、30號)kap頭前ê衛民街路。

新樓ê名,是ùi 1874年(同治3年),甘為霖牧師kap德馬太醫生tī城內彌陀寺後永康里西竹圍ê所在,買..ê(永遠租給約)一ê花園,大概三坵,koh tī 1876年起khiā-ke。後來m̄-nā厝,連hit tah,甚至tī新買ê土地附近(1886年契約、1897年才買好)新起醫館,mā號做「新樓醫院」。1900年醫館ùi舊館sóa kàu新館。

《台灣教會公報》 2028期 主後1991年1月13