《賴永祥講書》

| | || 轉寄

《教會史話》(1_090)紀念賓威廉

將本仁約翰(John Bunyan, 1628~1688)ê寓言文學 Pilgrim’s Progress介紹hō͘中國ê人,就是賓威廉牧師(William Charlmers Burns, 1815~1868)。 「天路歷程」是伊號ê翻譯名。原冊是基督徒靈程經驗之談,hông翻譯做百gōa種ê文字,不知感動了gōa chē世間ê人?賓威廉ê中文翻譯,描寫kah真生動,句法簡潔,用字適當,讀chit本冊完全攏無感覺著che是外國人所翻譯的。譬如講tī「指示窄門」hia有「欲入生門得上天,先當認罪立門前,窄門切叩方能入,主宰恩慈赦我愆」。koh有「罪人奔離必亡城,來叩窄門望得生,求主 垂憐開活路,鴻恩永頌樂高聲」。第一ê將Christian chit-ê詞翻做「基督徒」就是伊。伊ê文章埋版初刊tī 1853年,官話版刊tī 1865年;白話字廈門音版(由打馬字拼出者)見tī 1853年。Tī早期ê台灣教會,「天路歷程」真受著重視;譬如講tī 1917年台灣大會派劉忠堅等六名委員檢討編輯主日學教科書,翌年委員回覆主日學應教:「舊約選略、真道問答、主日神糧、基督傳、馬可、路加、使徒行傳、天路歷程」。

賓威廉是母會英國長老教會所派ê首任宣教師,1847年抵華,先後tī香港、廣州、廈門、上海、汕頭、北京kap東北ê牛莊(54歲tī hia過身),在華傳教達20年之久。潮州長老會醫院,就是以伊ê名來號名;tī 台灣,偕叡理牧師(George Leslie Mackay)mā將tī三貂嶺西北海岸平埔族「新社」ê教堂,叫做賓教會(Burn’s Church)。據偕牧師所講ê(From Far Formosa, p.223),hit-ê教會tī一條清流ê堤頂面,位置優美,建物適配,石造,用灰泥加以塗白,而且有玻璃窗,光線良好。由偕牧師所設計,陳火(榮輝)監工而成。偕牧師tī伊ê日記1889年12月11日條云:「從頂雙溪到新社去。新建禮拜堂,花費500美元,是底得律ê馬偕船長夫人所捐ê。伊是加拿大人。Chit-ê堂是要紀念賓威廉牧師」。可惜偕牧師過身了後,伊所開拓ê平埔社教會衰亡,chit-má以經看bōe著「賓教會」a。

偕叡理牧師為何beh建立「賓教會」leh?據偕牧師云:賓威廉牧師(在其1844年至1846年間之加拿大佈道旅行之途上)bat來過若拉村(Zorra, 偕牧師幼年居之),對當地宗教生活灌輸了新ê力量,伊ê名tī hit時chūn逐家攏知,我細漢時chūn(時只3、4歲)ê心靈mā領受著伊思想ê影響。

所以台海基督長老教會南北兩支,攏會凍tī賓威廉身上chhōe著伊ê根!

《台灣教會公報》 1973期 /1974期 主後1989年12月24日/1989年12月31日