《主編e5話》

| | | 轉寄

台語電腦五四三(二)Kài輕鬆台語漢羅輸入法(1) 安裝概論

2001年九月,我開始向李勤岸教授學台語。我tam-tio̍h母語ê súi了後,就決心放棄寫過百萬gōa字ê華語寫作。李教授mā有教阮蘇芝明先生開發ê HOTSYS 輸入法,但我iáu是用華語ê自然輸入法。有一工李教授提醒我講,用華語輸入漢字,tī腦中tio̍h經過翻譯,若用台語輸入法就ē-tàng kā想beh講ê話直接寫出來,加真順序爽快,我就緊kā HOTSYS學會曉來輸入漢字。

XP電腦上市了後, HOTSYS bē-tàng用,感謝劉杰岳先生教我用Microsoft「通用輸入法編輯 工具」,ē-tàng家己建立詞庫。我kā伊整理做「輕鬆台語漢字輸入法」,kap「微軟注音」 仝款單字輸入。

 2005年底左右,有人tī網路頂面批評「輕鬆台語漢字輸入法」單字輸入真落伍,我就利用盲人二級點字ê理念,開發「Kài輕鬆(KKS)台語漢羅輸入法」。這就是kā「微軟注音」ê ㄅㄆㄇㄈ詞庫換做台語羅馬字詞庫,輸入操作kap「微軟注音」,但咱有「詞條速打」功能,速度比華語khah緊真chē。

安裝方法kap詞庫:Chit-ê輸入法適合英文版kap中文版XP電腦,請來台語信望愛網站 http://taigi.fhl.nt,tī台語工具點選「KKS教羅漢羅輸入法」,kā“KKS_Kaulo_ol.zip”檔案下載,存tòa你ê電腦桌面。請照其中ê「安裝說明」來安裝,安裝好勢了後就照其中ê「輸入說明」來輸入,án-ne就ē-tàng真輕鬆來書寫漢羅台語文。

目前台語信望愛也有開發「KKS台羅漢羅輸入法」kap「KKS客語漢羅輸入法」,請多多利用指教。你家己增加ê詞庫,若想boeh分享hō͘大家使用,請kā增加ê部分檔案e-mail hō͘我,thang合併了後提供新詞庫hō͘大家使用。詞庫ê詞條jú-chē,台語文書寫就會jú輕鬆,目前輸入速度已經超過ㄅㄆㄇㄈ,ǹg望有一工會kap英語輸入相siâng輕鬆。

大家來phah拚,hō͘台語文早日出頭天!

註: 影音版: http://taigiol.fhl.net/vcd/rotaiugbk.php?user=taigi&bid=6&proc=read&msgno=2