《台灣另類牧師.醫師─謝緯》

| | | 轉寄

11- 04 謝緯 ê 告別式

二林基督教病院是謝緯創辦 ê(1964),最後卻 mā 因為他 beh 趕去二林為病人開刀, tī 路中喪失性命。

Beh 按怎辦理謝緯 ê 告別式,真 chē 單位 lóng 極力 teh 爭取, sio-chiⁿ 真久。Tī 情義上,謝緯為 tio̍h 二基病院貢獻非常大,koh 因為前往 chit 間病院來意外身亡,二基希望舉行「院葬」;謝緯 bat 擔任台中中會議長(1966),因此,台中中會主張「中會葬」;謝緯出身南投,又 koh 是南投教會 ê 牧師(義務職),所以,南投教會全體長執、會友以及家族希望「教會葬」;長老教會總會認為謝緯當時是 tī 總會議長任內因公殉職 ê ,所以應該 tio̍h 舉辦「總會葬」。為 tio̍h 和平解決 chit 層代誌,最後由謝緯胞弟謝綸出面協調,以「體會故人生前做人心意」─ 處理代誌以「圓滿」為原則,來讓步 hō͘ 總會。 Tùi 按呢以「總會葬」儀式來送別謝緯。















6月22日(禮拜一)下晡1點,tī 南投鎮中山街39號(現在79號)南投基督長老教會隆重舉行告別禮拜,由總會副議長高俊明牧師以「息勞歸天」為題證道。講道中,高俊明堅定 koh 有力講:「上帝既然 beh 息謝緯牧師 tī 世間 ê 勞苦重擔,自然有祂特別 súi ê 旨意。謝牧師雖然離開咱,代先 tńg 去祖家,咱應該學習謝牧師愛上帝、愛人 ê 精神。咱今仔日失去一位可敬、可愛ê謝牧師, ǹg-bāng 將來 ē-tàng 出來 koh-khah chē 位學(o̍h)他、親像他 ê 謝牧師 — 臺灣 ê 史懷哲。」












來參加告別式 ê,有政府首長官員、天主教 kap 基督教等 ta̍k 教派 ê 主教、牧師,以及長老教會總會全體幹事、各中會議長、總委、中委、親戚、朋友等三千 goā 人。出殯 ê 行列,koh-khah 是引人注目。平常時車輛真少 ê 南投街仔,tùi 每一條路看過去,人是 e-e 陣陣,如準 teh「做醮」。因為出殯行列 siūⁿ 過頭長,憲兵 kap 警察單位出動大批人馬維持交通。That tī 路邊 kap 亭仔腳 ê 人群,有 khiā-teh ê、 跪 teh ê,甚至 mā 有哭倒在地 ê。「痛失英才」、「英年早逝」、「哲人已遠」,講出 hiah-ê 人對謝緯最後 ê 心聲,除了懷念, koh 真 m̄-kam。

謝緯 ê 丈人楊雲龍以輓聯追悼他 ê 子婿:

謝神救恩效主犧牲 克盡忠牧殉使命
緯世頹風仁心惠眾 發揚醫德立標竿


《台灣教會公報》亦以頭版刊出「總會議長謝緯牧師因公殉職」,並附輓聯:


謝無怨言忠誠善牧務為公
緯有古道盡職良師痛急逝




謝緯受召 chìn 前,tī 1970年5月以總會議長身份,由夫人楊瓊英陪同,做伙到台南市主持台南神學院 ê 畢業典禮。結束了後,他放棄台南神學院ê聚餐,就直接到市內設 tī 民權路 ê 楊雲龍眼科病院,他 ê 丈人厝內食中晝。食完了後,謝緯 kap 牽手同齊趕緊開車到市府路,探望小妹謝瑤, koh 再往南去高雄縣岡山鎮,拜訪大姐謝瓊。這是 m̄ 是料想家己無 joā 久就會「遇難」,代先 kap 遠遠 tī 南部 ê 親人相辭?是一個疑問, mā 值得思考 kap 想像。